Një grua 35-vjeçare është arrestuar në Tajlandë pasi dyshohet se filmoi veten duke kryer marrëdhënie seksuale me murgj budistë dhe më pas i shantazhoi ata.
Wilawan Emsawat, e cila njihej me pseudonimin Sika Golf, akuzohet për marrëdhënie të papërshtatshme me 13 murgj dhe gjithashtu përballet me akuza për pastrim parash dhe pranim mallrash të vjedhura.
Raportet lokale thonë se 35-vjeçarja arriti të zhvaste më shumë se 10 milionë euro nga murgjit budistë duke përdorur video dhe foto të takimeve të tyre seksuale për shantazh.
Policia sekuestroi pesë nga telefonat celularë të 35-vjeçares, në të cilat gjeti videot dhe fotot në fjalë. Ata panë disa nga murgjit të veshur me rrobat e tyre tradicionale portokalli në video me përmbajtje jo të hijshme.
Hetimi rezultoi në përjashtimin e 9 nga 13 murgjve nga urdhri manastiror, dhe numri i personave të përfshirë në skandal pritet të rritet.
Hetimi u nxit nga zhdukja e abatit të tempullit Wat Tri Thotsathep Worawihan të Bangkokut qershorin e kaluar. Siç doli më vonë, arsyeja e ikjes së tij ishte lidhja e tij dashurore me 35-vjeçaren, e cila pretendonte se ishte shtatzënë dhe i kërkonte 206,000 euro. Kur ai refuzoi të paguante, 35-vjeçarja ia zbuloi lidhjen e tyre bashkëfetarëve të tij, duke rezultuar në largimin e abati nga Tajlanda.
Një murg tjetër pranoi se Wilawan i kishte dhuruar një makinë gjatë lidhjes së tyre, duke shtuar se u shkatërrua kur zbuloi se kishte një aferë me një murg tjetër. Kur ai e pyeti për këtë, ajo dyshohet se filloi ta shantazhonte për para.
Sipas të dhënave nga llogaritë bankare të Wilawan, transaksione me vlerë mbi 10 milionë euro kanë ndodhur në tre vitet e fundit, me autoritetet që dyshojnë se një pjesë e konsiderueshme e këtyre parave vjen nga arkat e tempullit, me 35-vjeçaren që dyshohet gjithashtu se ka shpenzuar shuma të mëdha në faqet e paligjshme të lojërave të fatit online. (A2 Televizion)
A2 CNN Livestream
MUND TE LEXONI GJITHASHTU
