Paqja mes Ukrainës dhe Rusisë varet në vetëm 20 pika. Presidenti i Ukrainës, Volodymyr Zelensky, ka dhënë detaje mbi një plan të përditësuar paqeje që i ofron Rusisë tërheqjen e mundshme të trupave ukrainase nga lindja, të cilën Moska e ka kërkuar.
Duke dhënë detaje, mbi tekstin e dakordësuar nga negociatorët amerikanë dhe ukrainas në Florida gjatë fundjavës, Zelensky tha se rusët do të përgjigjen të mërkurën pasi amerikanët të kenë folur me ta. Duke e përshkruar planin si “kornizën kryesore për t’i dhënë fund luftës”, presidenti nënvizoi se pakti propozonte garanci sigurie nga SHBA-të, NATO-ja dhe europianët për një përgjigje të koordinuar ushtarake nëse Rusia do të pushtonte përsëri Ukrainën.
Lidhur me çështjen kyçe të Donbasit lindor të Ukrainës, Zelensky tha se një “zonë e lirë ekonomike” ishte një prej mundësive. Ai u tha gazetarëve se, meqenëse Ukraina ishte kundër tërheqjes, negociatorët amerikanë po kërkonin të krijonin një zonë të çmilitarizuar ose një zonë të lirë ekonomike.
“Ekzistojnë dy mundësi,” tha Zelensky, “ose lufta vazhdon, ose diçka do të duhet të vendoset në lidhje me të gjitha zonat e mundshme ekonomike”. Plani 20-pikësh shihet si një përditësim i një dokumenti origjinal prej 28 pikash, të dakordësuar nga i dërguari i SHBA-së, Steve Witkoff, me rusët disa javë më parë, i cili u pa gjerësisht si i orientuar shumë drejt kërkesave të Kremlinit.
Rusët kanë këmbëngulur që Ukraina të tërhiqet nga pothuajse një e katërta e territorit të saj në rajonin lindor të Donetskut në këmbim të një marrëveshjeje paqeje. Pjesa tjetër është tashmë nën pushtimin rus.
Çështjet e ndjeshme, përfshirë çështjet mbi territorin, do të duhej të zgjidheshin “në nivelin e udhëheqësve”, por drafti i ri do t'i siguronte Ukrainës garanci të forta sigurie dhe një forcë ushtarake prej 800,000 trupash, shpjegoi Zelensky.
Pjesa më e madhe e planit të përditësuar i ngjan asaj që doli nga bisedimet e fundit në Berlin, ku morën pjesë negociatorët amerikanë Witkoff dhe Jared Kushner me udhëheqësit ukrainas dhe europianë. (A2 Televizion)
A2 CNN Livestream
MUND TE LEXONI GJITHASHTU
