Qindra serbë, nga Kosova, Serbia dhe vendet e rajonit u mblodhën në Gazimestan, një monument historik rreth 10 kilometra larg kryeqytetit të Kosovës, Prishtinë, për të shënuar festën e Vidovdanit më 28 qershor.
Kisha Ortodokse Serbe ka përkujtuar atje, vuajtjet dhe betejën e serbëve kundër ushtrisë turke në Kosovë në vitin 1389. Policia e Kosovës është kujdesur për sigurinë e kësaj feste, ndërsa të pranishëm ishin edhe pjesëtarë të KFOR-it italian.
Sipas policisë, nuk pati incidente që ndikuan në mbarëvajtjen e festimeve, përveç shoqërimit të një personi në një stacion policor, megjithatë gjatë aktivitetit nuk munguan thirrje provokuese, të tilla si “Kosova është zemra e Serbisë”.
Në përkujtimin e Vidovdanit, numri i vizitorëve ishte dukshëm më i ulët se në vitet e kaluara. Policia e Kosovës këtë vit nuk lejoi sjelljen e flamujve apo të ndonjë simboli tjetër, përveç atyre kishtare.
Vitet e kaluara ka pasur arrestime për nxitje të urrejtjes fetare, ndërsa në 2023 në Gazimestan, Vidovdani nuk u shënua për shkak të përkeqësimit të situatës së sigurisë. (A2 Televizion)
A2 CNN Livestream
MUND TE LEXONI GJITHASHTU
