SHBA i përgjigjet kërcënimeve të Vuçiçit: Kosovarët të flenë të qetë, NATO është aleanca më e suksesshme

Pas kërcënimit të Presidentit serb Aleksandër Vuçiç për pushtimin e Kosovës, SHBA nuk ngurron t’i japë garanci të forta sigurie Kosovës.

Ambasadori amerikan në Prishtinë, Jeffrey Hovenier, u tha qytetarëve të mos shqetësohen, pasi misioni i NATO-s në Kosovë është i gatshëm të bëjë gjënë e duhur: “Mund të them që përkushtimi ynë ndaj sigurisë së Kosovës, garancitë e sigurisë që SHBA-ja ka ofruar, qëndrojnë të forta si kurrë më parë. Ne flemë të qetë sa i përket këtij kërcënimi. Mendojmë se NATO-ja është e përgatitur dhe e gatshme dhe se populli i Kosovës duhet të jetë i qetë, pasi aleanca ushtarake më e suksesshme në histori ka një prani të madhe këtu, që është e gatshme të bëjë gjënë e duhur”.

Duke pohuar se Kosova do të jetë një ditë anëtare e Aleancës së NATO-s, Hovenier sugjeroi se nuk ishte dakord me deklaratat e homologut të tij në Serbi, që tha se Beogradi ishte më pranë aleancës ushtarake se Prishtina: “Ne duam të shohim avancimin e Kosovës drejt NATO-s. Kosova përputhet mjaft mirë me Aleancën sa i përket vlerave dhe institucioneve, kështu që është mirë që shumë çështje të pazgjidhura të zgjidhen dhe një ditë ta shohim Kosovën si një anëtare të plotë të NATO-s. Ne jemi duke punuar drejt këtij qëllimi. Tani për tani, unë do t'i kundërshtoja ata që duan të bëjnë krahasime dhe kontraste se kush qëndron ku në raport me NATO-n”.

Deklarata e Hovenierit për gazetarët u bë pas një takimi që ai zhvilloi me zëvendëskryeministrin e Kosovës, Besnik Bislimi. Një ditë pas raundit të bisedimeve në Bruksel, diplomati amerikan deklaroi se nuk kishte marrë ndonjë propozim për dinarin nga autoritetet në Prishtinë.  (A2 Televizion)