“Radoiçiç i lirë, rreziku mbetet i lartë”, kreu i policisë në Kosovë: Lëvizje të forcave serbe në kufi

“Derisa Radoiçiçi, grupi i tij terrorist vazhdon të jetë i lirë dhe vazhdon të qëndrojë në kufi të Kosovës, rreziku është akoma aktiv.”

Ky është vlerësimi i drejtorit të Policisë së Kosovës, Gazmend Hoxha, lidhur me situatën e sigurisë në vend, veçanërisht në pjesën veriore. Ai sqaron se policia ka shtuar kapacitetet e saj për t’i bërë ballë çdo kërcënimi ndaj shtetit.

“Ka pasur lëvizje të forcave serbe në kufij të Republikës së Kosovës. Ne i kemi vërejtur, i kemi monitoruar edhe kemi kapacitete që të monitorojmë. Faktikisht ne jemi duke punuar në bashkëpunim me KFOR-in dhe EULEX-in atje, kemi patrullime të përbashkëta. KFOR-i ka shtuar prezencën e vet me ushtarë atje edhe me teknikë. Kështu që duhet të shpresojmë që të mos kemi telashe serioze”, tha Hoxha.

Këtë deklaratë e bëri gjatë një dëshmie në Komisionin për Çështje të Sigurisë në kuvendin e Kosovës.

“Situata e përgjithshme e sigurisë në Republikën e Kosovës bazuar në zhvillimet aktuale në vend, rajon dhe më gjerë, vlerësohet të jetë e qetë. Megjithatë, në pjesën veriore të Kosovës edhe më tutje situata e sigurisë mbetet e brishtë. Me mundësi të tensionimit, si rezultat i aktiviteteve të strukturave ilegale dhe grupeve kriminale terroriste”, u shpreh ai.

Një pjesë e dëshmisë së kreut të policisë është mbajtur me dyer të mbyllura për arsye të informacioneve sekrete.

“Në pjesën e mbyllur ne kemi folur për situatën e sigurisë në veri të Kosovës, pjesën e katër komunave veriore atje, punën e policisë, angazhimin, sfidat që ne i kemi si polici në tentim të përmbushjes së misionit tonë të sigurisë së qytetarëve dhe sigurisë të kufijve tanë dhe sovranitetit të shtetit të Kosovës, përfundoi Hoxha. (A2 Televizion)