Presidenti francez, Emmanuel Macron, ka njoftuar futjen e një dispozite të re që do t'u lejojë të rinjve nga mosha 18 deri në 25 vjeç të marrin prezervativë falas në farmaci nga 1 janari 2023.
"Në farmaci, prezervativët do të jenë falas për 18/25 vjeç. Do të fillojë më 1 janar. Është një revolucion i vogël në parandalim", tha kreu i Elysee, gjatë diskutimeve në Këshillin Kombëtar të Rithemelimit (Cnr), kushtuar shëndetit të të rinjve.
Në Francë, që nga 10 dhjetori 2018, prezervativët rimbursohen me asistencë publike me recetë mjekësore. Por tani Macron dëshiron të shkojë më tej.
Oferta falas që ai shpalli për të rinjtë nga mosha 18 deri në 25 vjeç ka të bëjë me pako me 6, 12 ose 24 prezervativë të disponueshëm në farmaci. Sipas Macron, shëndeti seksual i të rinjve është një çështje që duhet marrë vërtet seriozisht.
Ndër të tjera, presidenti francez përmendi vaksinimin e adoleshentëve, djemve dhe vajzave, kundër infeksioneve me virusin papilloma, të lidhur me shfaqjen e tumoreve.
"Është një punë e madhe informacioni, duhet të bëhet në shkolla, ne duhet të shumëfishojmë përpjekjet tona dhe do ta bëjmë. Nuk e përjashtoj kalimin drejt vaksinimit të detyrueshëm, kur kemi rekomandimet e duhura shkencore”, paralajmëroi Macron.
Sa i përket edukimit seksual, presidenti francez tha: "Ne nuk japim më të mirën tonë për këtë çështje. Realiteti është shumë, shumë larg teorisë. Ne duhet t'i kërkojmë më mirë mësuesit tanë, duhet t'i kthehemi sensibilizimit të tyre". (A2 Televizion)
A2 CNN Livestream
MUND TE LEXONI GJITHASHTU
