Rinis në Londër beteja ligjore e Julian Assange për të shmangur ekstradimin në Shtetet e Bashkuara, ku akuzohet për veprimtari kriminale mbi aktivitetin e website-it WikiLeaks. Autoritetet amerikane e akuzojnë australianin 49-vjeçar, Assange, se ka konspiruar për të hakuar kompjuterat qeveritarë, gjithashtu për shkelje të një ligji për spiunazhin, me informacionet konfidenciale të lëshuara nga WikiLeaks gjatë periudhës 2010-2011.
Assange shihet nga admiruesit e tij në mbarë botën si një kampion i fjalës së lirë dhe i gazetarisë investigative, që bëri publike raste abuzimi me pushtetin dhe praktika të tjera të dyshimta të forcave të armatosura të SHBA duke sfiduar me guxim superfuqinë globale. Kritikët e tij në Uashington dhe në vende të tjera të perëndimit, thonë se Assange duke publikuar dokumente të paautorizuara, vuri në rrezik jetën e shumë njerëzve ne Irak, Iran dhe Afghanistan, të cilët në një mënyrë a në tjetrën kishin ndihmuar Shtetet e Bashkuara.
Të shumta janë edhe kritikat mbi publikimin nga WikiLeaks në vitin 2016, gjatë fushatës presidenciale, të dokumenteve të vjedhura nga Komiteti Kombëtar Demokrat, duke dëmtuar kandidaten Hillary Clinton. Assange i mohon akuzat e hetuesve amerikan të cilët pretendojnë se dokumentet janë siguruar nga hakerat rus.
10 vite trazirash gjyqësore
Gjithsesi, kjo çështje nuk është pjesë e këtij procesi gjyqësor. Sipas skuadrës së mbrojtësve ligjorë të Assange në Londër, akuzat e Shteteve të Bashkuara ndaj klientit të tyre janë tërësisht politike dhe një kërcënim për lirinë e shtypit. Ata gjithashtu ngrenë shqetësimin mbi një vetëvrasje të mundshme të themeluesit të WikiLeaks, nëse ekstradohet në Shtetet e Bashkuara ku mund të vuajtë disa vite burg. Në muajin mars, avokatët kërkuan lirimin me kusht të Assange si kontingjent vulnerabël ndaj koronavirusit.
Kërkesa u refuzua me arsyetimin se ai mund të zhduket pa lënë gjurmë. Trazirat e procesit gjyqësor të Assange datojnë në 2010-n kur ai nisi një betejë kundër ekstradimit në Suedi ku akuzohej për ngacmim seksual, akuza të cilat më pas u hodhën poshtë.
“Ne biem dakord që nëse prokurori suedez që lëshoi urdhërarrestin në këtë rast nuk është një autoritet gjyqësor për qëllimet e veprës, atëherë urdhri nuk është i vlefshëm dhe nuk ka asnjë bazë ligjore për ekstradimin e zotit Assange në Suedi”, deklaroi në gjyq Dinah Rose, avokatja e Assange.
Shumica ka arritur në përfundimin se prokurori publik suedez është një autoritet gjyqësor. Për pasojë, kërkesa për ekstradimin e zotit Assange është bërë në mënyrë të ligjshme dhe ankesa e tij kundër ekstradimit është hedhur poshtë në përputhje me rrethanat.
I “burgosur” në ambasadë
Në qershor të 2012, pasi mbaroi gjithë resurset ligjore dhe duke rrezikuar ekstradimin, Assange kërkoi strehim në ambasadën e Ekuadorit, në një apartament në katin e parë të një ndërtese në qendër të Londrës. Ai qëndroi aty për 7 vite, për të evituar arrestimin, periudhë gjatë së cilës u bë me dy fëmijë, ekzistenca e të cilëve u mësua vetëm këtë vit. Pasi Ekuadori revokoi azilin, Assange u nxor nga ambasada në prill të 2019-s dhe u dërgua në burg për shkelje të lirimit më kusht në vitin 2012. Ai vijon të qëndrojë në burg duke pritur vendimin mbi kërkesën për ekstradim nga Shtetet e Bashkuara. Seancat dëgjimore u zhvilluan në muajin shkurt dhe pritej të rinisnin në maj, por u shtynë për shkak të shpërthimit të pandemisë COVID-19.
Gjykata do të dëgjojë tashmë të thirrurit e palës mbrojtëse, të cilët do të dëshmojnë mbi motivimin politik të procesit të tij, mbi rrezikun e shëndetit mendor të Assange, po ashtu do të ngrenë pretendimet se kushtet në burgjet amerikane shkelin ligjet e Mbretërisë së Bashkuar për të drejtat e njeriut dhe se ai dhe avokatët e tij u spiunuan ndërsa themeluesi i WikiLeaks ishte në ambasadën e Ekuadorit. Stella Moris, partnerja dhe mamaja e fëmijëve të Assange ka ndërmarrë një fushatë financiare duke arritur të mbledhë, deri më tani, 88 mijë stërlina për të përballuar shpenzimet ligjore. (A2 Televizion)
A2 CNN Livestream
MUND TE LEXONI GJITHASHTU
