Shehi: Koalicioni PD-PS? Tezë reaksionare e Ramës, do të ishte fundi i demokracisë në vend

Nga A2 CNN
23 Shtator 2020, 20:48 | Politikë
Shehi: Koalicioni PD-PS? Tezë reaksionare e Ramës, do të ishte

Me ardhjen e vjeshtës është ndezur edhe situata politike, ku divergjencat midis opozitës dhe pozitës për sa i përket kodit zgjedhor që do të çojë në zgjedhjet e 25 prillit janë gjithmonë e më të mëdha. Por për Dashamir Shehin, liderin e LZHK-së dhe njëra prej figurave me karizmatike të opozitës së bashkuar, ky nuk është “fundi i botës”, sepse objektivi është diku tjetër.

“Siç kemi folur edhe dje me zotin Basha, do bëjmë luftë për të mbrojtur koalicionin, por edhe listat e hapura, sa të jetë e mundur. Këtë do ta bëjmë para dhe pas 1 tetorit. Drafti të shkoj në Parlament, Rama le ta aprovoje me njerëzit e vet. Rama do të hedhë çdo jave nga një gurë, por unë kam bindjen se nuk duhet të merremi me lojërat e tij. Pra të mbrojmë koalicionin dhe listat, por po nuk u bënë nuk është fundi i botës. Ne do të shkojmë gjithsesi në votë me çfarëdolloj ligji sepse nuk ka asgjë që e shpëton Edi Ramën”, thotë Shehi për A2.

Çështja e kodit zgjedhor nuk është për të problemi madhor i Shqipërisë. “Po ikën rinia, sikur opozita vetëm të ngadalësonte këtë proces, do të ishte arritje. Pastaj, a do të kemi një rrogë në xhep, do na mbarojnë hallet, vrasjet në rrugë? A do kemi shpresë për Europë, apo do marrim rrugën e Anadollit ku po na çon Rama?”, shton ai.

Premtimet e Ramës për të janë gënjeshtra elektorale, dhe kryeministri është i rrethuar nga një “botë e pisët”, por nuk mungon t’i bëjë kritika palës të cilës i përket. “Ka ende personazhe që i vërtiten tavolinës opozitare që kanë të gjithë ngarkesën negative. Ky është një proces, që do vazhdojë, dhe besojmë që shumicën e kemi pastruar. Ky nuk është thjesht proces moral, por edhe ligjor. Por ne kemi intentin t’i japin një shkelm kësaj bote të pisët, dhe këtë rrugëtim e kemi filluar. Ditën që do të iki Rama do të çlirohen shumë energji pozitive në vend”, pranon ai.

Ndërkohë, janë shtuar zërat që e tregojnë si të mundur një koalicion të gjerë PD-PS, në rast se asnjë nga subjektet siguron numrat për qeverisje.

Për Shehin, “kjo është një tezë reaksionare e Ramës, që për hir të së vërtetës eci në 2017 dhe i bëri shumë dëm opozitës shqiptare dhe moralit politik. Ditën që do të ndodhte kjo punë unë dhe shumë të tjerë nuk do të merremi më me këtë zanat. Atë ditë nuk do të kishte më opozitë, as demokraci. Kush do t’i sulmonte? Sot tentojmë të denoncojmë, po të ishin bashkë nuk do të kishte më as denoncim”, gjykon politikani i njohur.

Kur flitet për koalicion të gjerë, shpesh herë vjen në mendje ai që i ka siguruar stabilitetin ndër vite një gjiganti europian si Gjermania, por për Shehin shembulli nuk mund të jetë më i largët nga realiteti ynë.

“Gjermania është vend totalisht demokratik, pothuajse nuk ka nevojë për opozitë sepse opozitën e bëjnë me mijëra media, pushtete lokale. Kush do të gënjejë shqiptarët e varfër që janë si gjermanët, unë i përgjigjem se kur fshatari ynë që ruan dhitë të bëhet si ai gjermani, me traktor dhe piano që luan valcer në shtëpi, le të bëhet e majta dhe e djathta bashkë, por në kushtet e sotme, dita kur të bëhet kjo aleancë do të jetë ajo më e errët për demokracinë shqiptare, do të kthehej Enveri”, përfundon Shehi. (A2 Televizion)

A2 CNN Livestream

Latest Videos