Lagja “Luigj Gurakuqi” në Elbasan u zgjua në orët e para të mëngjesit nga një shpërthim i ndodhur në një lokal.
Pikërisht në bulevardin kryesor, rreth orës 4 të mëngjesit ka shpërthyer një sasi lënde eksplozive e cila ishte vendosur në ambientet e jashtme të një prej lokaleve më të frekuentuara.
Lokali administrohet nga dy vëllezër, Krios dhe Mateo Toci, ky i fundit ish-futbollist i Elbasanit. Fatmirësisht nga shpërthimi janë shënuar vetëm dëme të konsiderueshme materiale dhe natyrisht ankth dhe frike tek banorët e lagjes.
Policia e shkuar në vendngjarje ka nisur hetimet dhe dyshimet e para janë se shpërthimi mund të ketë lidhje me konkurrencën në këtë zonë ku operojnë shumë lokale, por pa ndonjë pistë konkrete.
Ndërkohë jo shumë larg këtij vendi, në të njëjtën lagje rreth një javë më parë u vra me mjete të forta Florina Lamçe, ndërsa një tjetër person u gjet i vrarë dhe i masakruar me mjete të ftohta pranë varrezave të qytetit.
Shpërthimi më i fundit ka rikthyer shpejt friken e ngjarjeve kriminale në qytetin e Elbasanit, i cili këtë verë duket se nuk po gjen qetësi.
Grupi hetimor po punon për zbardhjen dhe sqarimin e rrethanave të ngjarjes, identifikimin dhe kapjen e autorëve. (A2 Televizion)
A2 CNN Livestream
MUND TE LEXONI GJITHASHTU
