Mijëra studentë shqiptarë kanë mbushur rrugët e Shkupit për të kërkuar respektimin e gjuhës shqipe, një e drejtë legjitime dhe kushtetuese, shkruan A2CNN.
Ata kanë kërkuar që gjuha amtare të jetë në auditoret e universiteteve, por edhe gjatë zhvillimit të provimeve. Të rinjtë paralajmëruan përshkallëzimin e protestave dhe shtrirjen edhe në qytete të tjera të Maqedonisë së Veriut.
Mijëra studentë shqiptarë kanë protestuar rrugëve të Shkupit, në mbrojtje të gjuhës shqipe, një e drejtë legjitime dhe kushtetuese.
Me flamuj kuqezi, me thirrje dhe pankarta në duar, të rinjtë shqiptarë kërkuan respektimin dhe garantimin e të drejtës së gjuhës shqipe në institucione zyrtare, përfshirë universitetet dhe zhvillimin e provimeve për degë të ndryshme.
Ndërkohë mësohet se edhe të rinj nga Shqipëria ishin nisur drejt Shkupit për t’iu bashkuar protestës së studentëve atje. Por grupi i studentëve nga Shqipëria është ndaluar dhe shoqëruar nga policia drejt Kumanovës.
Edhe studentë nga Kosova, Tetova e Struga janë bashkuar me moshatarët e tyre në Shkup për të kërkuar respektimin e shqipes edhe në auditoret e universiteteve. Protesta e të rinjve shqiptarë u monitorua nga forca të shumta policie.
Nuk kishte incidente apo përplasje, megjithatë organizatorët dërguan mesazhe të qarta për politikën dhe krerët e qeverisë. Nëse shqiptarëve do t’u mohohet e drejta e gjuhës, protestat do të përshkallëzohen duke u shtrirë në të gjitha qytetet. (A2 Televizion)
A2 CNN Livestream
MUND TE LEXONI GJITHASHTU
