Sherr me fqinjin me thika e kosore, arrestohen babë e bir në Dimal, tre të plagosur

Një konflikt mes fqinjve në Dimal ka përfunduar me tre persona të plagosur dhe dy të tjerë në pranga.

Policia informon se ka arrestuar Bastri dhe Emiljano Xhalili (babë e bir), pasi akuzohen se kanë shkuar në banesën e fqinjit të tyre dhe kanë plagosur atë së bashku me të birin dhe një të afërmin e tyre.

“Shërbimet e Komisariatit të Policisë Berat, pas njoftimit të marrë se në fshatin Goriçan, Dimal, mbasditen e djeshme, po ndodhte një konflikt ndërmjet disa shtetasve, kanë shkuar menjëherë në vendin e ngjarjes, për të parandaluar përshkallëzimin e konfliktit. Si rezultat i veprimeve të shpejta, janë kapur në flagrancë dhe janë arrestuar shtetasit: Bastri Xhalili, 65 vjeç (i dënuar më parë) dhe Emiljano Xhalili, 24 vjeç, (babë e bir), të dy banues në fshatin Goriçan, Dimal, për veprën penale “Vrasje me dashje, e mbetur në tentativë”, në bashkëpunim” dhe “Prodhimi, mbajtja, blerja apo shitja pa leje e armëve të ftohta”.

Këta shtetas dyshohet se mbasditen e djeshme, kanë shkuar me mjete prerëse (thikë dhe kosore), në banesën e shtetasit S. Xh., dhe pasi janë konfliktuar, kanë plagosur me mjet prerës (thikë dhe kosore), shtetasit S. Xh., 49 vjeç., J. Xh., 24 vjeç (babë e bir) dhe E. Xh., 18 vjeç, (i afërm i tyre, i cili ndodhej në banesën e shtetasit S. Xh, kur ndodhi konflikti)”, sqaron policia.

Të dëmtuarit kanë marr mjekim në Spitalin Rajonal Berat, jashtë rrezikut për jetën. (A2 Televizion)