Kushtet nuk janë pjekur për të zbutur më tej politikën monetare. Banka e Shqipërisë vendosi të mbajte të pandryshuar, në nivelin 2.75 për qind normën bazë të interesit për lekun.
“Këshilli Mbikëqyrës gjykon se qëndrimi aktual i politikës monetare mbetet i përshtatshëm për përmbushjen e objektivit tonë të stabilitetit të çmimeve në të ardhmen. Këshilli Mbikëqyrës vëren se balanca e përgjithshme e presioneve afatmesme po afrohet gradualisht drejt objektivit tonë të inflacionit”, tha Gent Sejko, guvernatori i Bankës së Shqipërisë.
Teksa argumentoi se ekonomia shqiptare do të vijë në rritje, e nxitur nga zgjerimi i mëtejshëm i konsumit dhe investimeve, guvernatori i Bankës së Shqipërisë, Gent Sejko tregoi edhe se ku do të ndërhyhet për të ulur normat e interesit.
“Perspektiva e zhvillimeve ekonomike në të ardhmen mbetet pozitive. Ekonomia shqiptare pritet të rritet me ritme të qëndrueshme në afatin e mesëm, ndërkohë që inflacioni do të kthehet në objektivin tonë prej 3% gjatë vitit 2025. Në këtë kuadër, Këshilli Mbikëqyrës vlerësoi se qëndrimi aktual i politikës monetare është ende i përshtatshëm për të garantuar stabilitetin e çmimeve dhe për të mbështetur zhvillimin e qëndrueshëm të ekonomisë.”
Teksa tregoi se Banka e Shqipërisë tërhoqi 1 miliardë euro nga tregu valutor vitin e shkuar për të frenuar disi “rrokullisjen e euros”, guvernatori Sejko shpjegoi edhe forcimin e lekut javën e shkuar.
“Ditët e fundit këtu mund të ketë ndikuar edhe rritja e shpenzimeve të qeverisë shqiptare në tregun valutor. Por sigurisht ka një korrektim. Kursi i këmbimit e kemi theksuar vazhdimisht është si pasojë e kërkesës dhe ofertës. Pa bërë analizë të mëtejshme në kursin e këmbimit unë do thosha që Banka e Shqipërisë ndërhyn në tregun valutor sipas kërkesave ligjore dhe rregullatorë."
Sipas vlerësimeve të Bankës Qendrore, rreziku kryesor që i kanoset ekonomisë së Shqipërisë janë zhvillimet gjeopolitike. Guvernatori Sejko argumentoi se pasiguria në lidhje me politikat tregtare dhe ekonomike që po ndiqen nga Presidenti i Shteteve të Bashkuara të Amerikës, Donald Trump mund të ketë ndikime të rëndësishme për ekonominë globale në përgjithësi dhe atë evropiane në veçanti. (A2 Televizion)
A2 CNN Livestream
MUND TE LEXONI GJITHASHTU
