Pas 7 protestave, për herë të parë protestuesit e opozitës kanë përfunduar në qeli. Gjyqtari i Tiranës Enkel Peza la në burg 5 prej 11 protestuesve të arrestuar në protestën e 17 prillit. Gjykata dha vendimin pas provave që referoi policia në prokurori për 5 prej protestuesve të arrestuar, të cilët ndryshe nga protestat e mëparshme u arrestuan në flagrancë kur po hidhnin molotovë në drejtim të Kryeministrisë.
Masa arrest me burg u caktua për Klement Çuçkën, 38 vjeç, Bujar Tushën, 29 vjeç, Henri Shapllon, 30 vjeç, Mirvet Toçillën 50 vjeç dhe Semi Bicin 25 vjeç, të cilët akuzohen për veprat penale “Kundërshtim i punonjësit të policisë”, “Prishja e rendit dhe qetësisë publike”, ‘’Mbajtje pa leje e armëve shpërthyese” dhe “Shkatërrim i pronës me zjarr”. Për 6 protestues të tjerë, Gjykata e Tiranës caktoi masën detyrim paraqitjeje.
Në kushtet e flagrancës policia sekuestroi 45 shishe molotov, madje duke aplikuar edhe një strategji të re, duke ndërhyrë në turmën e protestuesve gjatë kohës që ata mbanin në duar apo çanta, molotovët. Kjo strategji u përdor për t'i arrestuar në kushtet e flagrancës.
Në seancën që zgjati 4 orë, avokatët e protestuesve kërkuan përjashtimin e gjyqtarit Enkel Peza me argumentin se ai dhe familjarët e tij kanë mbajtur funksione në strukturat lokale të PS në Kavajë, por kërkesa u rrëzua nga gjyqtari tjetër, Dritan Hallunaj. Pasi gjykata la në burg 5 protestuesit, sekretari i përgjitshëm i PD, Flamur Noka hodhi akuza në drejtim të gjyqtarit dhe policisë.
PD ka paditur ministrin e Brendshëm, Besfort Lamallari, kryepolicin Skënder Hita dhe gjithë zinxhirin drejtues të Policisë pasi sipas opozitës kanë ushtruar dhunë ndaj protestuesve dhe kanë përdorur spraj kundër ariut. (A2 Televizion)
A2 CNN Livestream
MUND TE LEXONI GJITHASHTU
