Pas kërkesave të përsëritura të zyrtarëve e ish-zyrtarëve të lartë të pandehur në Gjykatën e Posaçme, për të mos u mbajtur të izoluar në sallën e gjyqit, i pari që mundi të “thyejë” kafazin e xhamtë ishte ish-ministri i shëndetësisë, Ilir Beqaj, Gjykata e Posaçme pranoi të martën kërkesën e bërë nga Beqaj, për të mos u mbajtur në kafaz, por në krah të avokatit të tij në çështjen “Sterilizimi”, raporton A2 CNN.
Në vendimin pranues gjykata argumentoi se Beqaj në këtë proces ka masën e sigurisë “detyrim për paraqitje”, se është vetëm një i pandehur dhe se në vijimësinë e procesit nuk është shfaqur ndonjë specifikë që të cenojë sigurinë.
Por sipas gjykatës, lejimi i Beqajt në krah të avokatit në sallë do të zbatohet në seancën e radhës, pasi të jetë njoftuar Drejtoria e Përgjithshme e Burgjeve për marrjen e masave.Për shkak të masës së butë ndaj Beqajt tek “Sterilizimi” as prokurori i çështjes nuk pati kundërshti për nxjerrjen nga kafazi, por i kërkoi gjykatës të mbajë parasysh faktin se masa “arrest në burg” është për një tjetër çështje, shkruan A2 CNN.
Në proceset përkatëse gjyqësore në Gjykatën e Posaccme, kërkesë për të mos u mbajtur në kafazin e sallës kanë bërë edhe kryebashkiaku i Tiranës, Erion Veliaj, dhe ish-Presidenti i Republikës, Ilir Meta. Sipas tyre, mbajtja në kafaz është trajtim diskriminues, degradues dhe degjenerues, por deri më tani, nuk kanë mundur të bindin gjykatën për të kundërtën. (A2 Televizion)
A2 CNN Livestream
MUND TE LEXONI GJITHASHTU
