Detaje të reja nga hetimet lidhur me atentatin e Lezhës. Autorët ishin me dy makina, ndërsa dy persona raportohet se kanë qëlluar në drejtim të objektivit të tyre.
Hetuesit janë kthyer sërish në vendngjarje dhe po marrin gjurmët e gjakut në vendin e ngjarjes, ku do të bëhet analiza e ADN-së, për të zbuluar nëse kemi të bëjmë me një person tjetër të plagosur përveç berberit. Katër plumba kanë prekur dhe dy biznese të tjera përballë berberhanes, por fatmirësisht personat që ndodheshin brenda kanë shpëtuar.
Nga këqyrja e të gjitha kamerave të sigurisë është zbuluar se autorët kanë qenë më dy makina, një Audi dhe një Passat. Tre persona kanë qenë te Audi dhe personat e tjerë te Passati. Rolin e qitëseve e kanë pasur dy persona që kanë qëlluar me breshëri drejt berberhanes.
Çfarë ndodhi?
Një plagosje me armë zjarri është regjistruar mbrëmjen e kësaj të diele në Lezhë, në zonën e njohur si kryqëzimi i Rrilës. I plagosur ka mbetur 30-vjeçari Sokol Daci, pronar i berberhanes ku ka ndodhur ngjarja. Sipas informacioneve paraprake, ai nuk ka qenë objektivi i atentatit, por është goditur aksidentalisht nga plumbat teksa ndodhej brenda ambientit të punës së tij, ku bashkë me të ndodheshin edhe persona të tjerë brenda në berberhane.
Burime policore bëjnë me dije për A2 CNN se autorët kanë mbërritur me një automjet tip Audi A3 përballë berberhanes. Tre persona kanë zbritur nga makina dhe kanë qëlluar me breshëri plumbash drejt berberhanes, ku dyshohet se ndodhej objektivi i atentatit, një person tjetër që ishte brenda në atë moment.
Më pas, autorët janë larguar me shpejtësi nga vendngjarja. Sipas të dhënave paraprake, dyshohet se ka pasur edhe kundërpërgjigje me armë zjarri, ndërsa personi që ishte shënjestër e atentatit është larguar.
Ndërkohë i plagosuri është transportuar me urgjencë drejt Spitalit të Traumës në Tiranë, ku ndodhet në gjendje të stabilizuar. Ai ka marrë tre plagë, në shpatull, në bark dhe në këmbë. (A2 Televizion)
A2 CNN Livestream
MUND TE LEXONI GJITHASHTU
