A2CNN mëson se paraqitet e rëndë gjendja shëndetësore e fëmijës së tretë, që mbeti i plagosur rëndë nga aksidenti tragjik në zonën e Spitallës në Durrës.
"Gjendja e tij është e rëndë, pasi ka dëmtime të shumta", konfirmoi për A2CNN Ministria e Shëndetësisë, që po ashtu tha se i mituri momentalisht është koshient.
Kujtojmë që katër fëmijë ishin duke luajtur në trotuar në momentin që mjeti tip “Benz” i drejtuar nga Nikoll Radaçi, përplasi tre të mitur, ndërsa një i katërt i shpëtoi mrekullisht aksidentit.
Dy nga fëmijët humbën jetën menjëherë në vendngjarje, ndërsa fëmija i tretë u transportua në Spitalin e Traumës. Dyshohet se drejtuesi 57-vjeçar i makinës tip “Benz ML” ishte i dehur në timon.
Drejtuesi i mjetit braktisi makinën duke mos u dhënë fëmijëve as ndihmën e parë, por duke u larguar me vrap në mes të lagjes. Shoferi është arrestuar nga policia, ndërkohë që vijojnë hetimet për ngjarjen.
57-vjeçari, që u ndërpreu jetën në moshën më të bukur dy 10-vjeçarëve, ka qenë person problematik edhe në të shkuarën, çka konfirmohet edhe nga dëshmitë e banorëve të zonës për A2CNN.
Njëri nga fëmijët e humbi jetën përballë dyqanit të familjarëve të tij, ku jetonte së bashku me motrën dhe të afërm të tjerë, ndërsa prindërit ndodhen në Itali për arsye shëndetësore.
(A2 Televizion)
A2 CNN Livestream
MUND TE LEXONI GJITHASHTU
