Skandali në zyrën e Bashkisë së Kukësit, jepet pretenca për Safet Gjicin dhe Alma Kaçin

SPAK ka dhënë pretencën për ish-kryetarin e Bashkisë së Kukësit, Safet Gjici dhe gruan me të cilën ai u kap duke kryer marrëdhënie seksuale në ambientet e zyrës së tij me Alma Kaçin, në këmbim të një tenderi.

Kështu, SPAK ka kërkuar 4 vjet e 6 muaj burg dhe nga gjykimi i shkurtuar dënimi përfundon me 3 vite. Për Gjicin u kërkua edhe dënim plotësues, 5 vjet heqje e së drejtës për të ushtruar funksione publike.

Ndërkohë, për Alma Kaçin SPAK ka kërkuar 1 vit e 6 muaj, ndërsa nga gjykimi i shkurtuar dënimi i konvertohet në vetëm 1 vit heqje lirie. Seanca e radhës është caktuar për më 25 janar.

Kujtojmë se, në seancën e parë, të pandehurit konfirmuan qëndrimin e tyre për gjykim të shkurtuar, ndërsa SPAK pretendoi se filmimi i videoskandalit në Bashkinë Kukës të jetë bërë me vullnet të plotë nga Alma Kaçi.

Sipas SPAK, nga provat e administruara, ka rezultuar se pas favorit seksual të marrë nga Gjici, mes tij dhe Kaçit është bërë një bisedë ku kryebashkiaku e drejton Kaçin për te Granit Gjana, për të folur mbi tenderin për strehimin e qenve endacakë.

Në banesën e Kaçit, është gjetur një USB, që përmbante filmimin bruto të aktit seksual në zyrën e Bashkisë. Kaçi ka dhënë disa versione gjatë marrjeve në pyetje. Fillimisht, ajo ka pretenduar se filmimin e ka bërë në kuadër të emisionit investigativ “Fiks Fare”, pasi, sipas saj, ishte gazetare e padeklaruar e këtij programi.

Sipas SPAK, në telefonin e Kaçit, iu gjetën biseda mes saj dhe gazetarëve të emisionit investigativ, ku Kaçi fliste për këtë filmim, por nuk është provuar një marrëveshje mes tyre. Në një tjetër deklarim, Kaçi ka pretenduar se për filmimin ka pasur dijeni edhe ish-kreu i Qarkut Kukës, Abedin Oruçi, që, sipas saj, ia kishte marrë me forcë USB-në. Por, ky pretendim i saj nuk ka gjetur mbështetje në prova të tjera. (A2 Televizion)