Kurimi jashtë vendit i fëmijëve me sëmundje të rënda është nisma më e fundit e ndërmarrë nga aktivisti Ardit Konomi dhe një qytetar në Korçë, të cilët synojnë mbledhjen e 20 mijë firmave për ta çuar projektligjin në Kuvend.
Në një lidhje me Dita Jonë në A2 CNN aktivisti Ardit Konomi bëri të ditur se nisma e cila ka nisur prej pak ditësh, ka marrë mbështetje të gjerë nga qytetarët.
“Grupi nismëtar që ka mbajtur diskutimet bazë, që ka marrë përsipër elementë të caktuar të përgatitjes së legjislacionit të eksplorimit të modeleve të studimit statistikor, ka qenë diku tek 20 vetë. Ndërkohë që deri tani janë mijëra, mund të them janë dy-tre ditë që ne kemi filluar me procesin e mbledhjes dhe janë të mira. Asnjë rast i vetëm nuk i ka thënë jo procesit”, tha ai në Dita Jonë në A2 CNN.
Sipas tij, kërkesa kryesore është krijimi i një kuadri ligjor dhe një fondi të dedikuar shtetëror që do të mbulojë trajtimet e specializuara jashtë vendit për fëmijët nga 0 deri në 18 vjeç.
“Kërkesa ligjore është për ta çuar projekt ligji në parlament është 20.000 firma. Unë besoj që do të mbledhim shumë më shumë brenda një afati tremujor, dhe besoj që dhe afati ka për t'u shkurtuar shumë. Besoj brenda një muaji sipas ritmeve deri tani, procesi është i përfunduar”, tha ai në Dita Jonë në A2 CNN.
Sipas tij nga të dhënat paraprake, në Shqipëri regjistrohen rreth 30 deri në 50 raste në vit të fëmijëve që kanë nevojë për trajtime të specializuara jashtë vendit, kosto që shpesh është e papërballueshme për familjet. Aktualisht, shumë prej tyre detyrohen të mbështeten te donacionet dhe fondacionet për të siguruar trajtimin.
“Në bazë të gjithë të dhënave statistikore që kemi gjetur ne deri tani, të studimit rast pas rasti të përllogaritjes krahasimore nga viti në vit, rezulton që në Shqipëri varion midis 30 kufiri më i ulët dhe 50 kufiri më i lartë i rasteve në vit që kanë nevojë tek fëmijët të cilët sipas prezantimit ligjor, janë nga 0 deri 18 vjeç individët që të kenë nevojë për trajtime të tilla të specializuara. Ka një kosto që unë do të rezervohesha ta thoja për momentin, sepse duhet të kalojmë dhe disa elementë të tjerë, por mund të them që është një pikë e realizuar me një buxhet të dedikuar”, theksoi ai në A2 CNN.
Nisma synon që institucionet shtetërore të kenë detyrim ligjor për të identifikuar, referuar dhe ndjekur çdo rast deri në zgjidhjen e plotë, duke shmangur vonesat dhe pasiguritë për familjarët.
Kjo nismë u nxit pas rastit të një 19-vjeçareje në qytetin e Korçës, e cila u diagnostikua me leucemi akute, kur shkoi të dhuronte gjak dhe pak muaj më pas humbi jetën. (A2 Televizion)
A2 CNN Livestream
MUND TE LEXONI GJITHASHTU
