Tentoi të vrasë 18-vjeçarin, arrestohet i riu në Korçë dhe një 51-vjeçar që e përkrahu

Nga A2 CNN
7 Korrik 2024, 11:22 | Kronikë

Tentoi të vrasë 18-vjeçarin, arrestohet i riu në

Policia e Korçës ka vënë në pranga një 27-vjeçar të shpallur në kërkim, për tentativën e vrasjes së një 18-vjeçari.

Ngjarja ka ndodhur më 19 qershor të këtij viti, ku 27-vjeçari në bashkëpunim me 4 shtetas të tjerë tentuan të vrisnin 18-vjeçarin në aksin rrugor "Korçë-Voskop". Në pranga përfundoi edhe një 51- vjeçar, i cili sipas policisë, përkrahu 27-vjeçarin, ndërkohë që në banesë iu gjetën armë zjarri me municion.

Njoftimi i Policisë

Korçë/Vijon me intensitet zbatimi i masave të përcaktuara në planin operacional mbarëkombëtar "Sundimi i ligjit". 

Kapet dhe vihet në pranga 27-vjeçari i shpallur në kërkim, në lidhje me ngjarjen e ndodhur më datë 19.06.2024, ku në bashkëpunim me 4 shtetas të tjerë tentuan të vrisnin shtetasin M. J.

Arrestohet në flagrancë edhe një shtetas tjetër, i cili përkrahu 27-vjeçarin  dhe posedonte në banesë armë zjarri me municion.

Procedohen penalisht edhe 2 të tjerë, të cilët fshehën provat materiale të kryerjes së krimit.

Sekuestrohen 1 armë zjarri automatike dhe municione luftarake.

Komisariati i Policisë Korçë, në zbatim të masave të planit operacional "Sundimi i ligjit", për kapjen e personave në kërkim dhe në vijim të punës hetimore për dokumentimin e plotë të ngjarjes së ndodhur më datë 19.06.2024, në lagjen nr. 17, Korçë, bazuar në informacionet e siguruara nga inteligjenca policore, mbi vendndodhjen e njërit prej shtetasve të shpallur lidhur me këtë ngjarje, kanë intensifikuar kontrollet për kapjen dhe vënien e tij përpara përgjegjësisë ligjore.

Si rezultat nga këto struktura në bashkëpunim me Forcën e Posaçme "Shqiponja" të DVP Korçë, u bë kapja dhe ndalimi i shtetasit në kërkim:

-A. D., 27 vjeç, banues në Korçë, pasi më datë 19.06.2024, në aksin rrugor "Korçë-Voskop", në bashkëpunim me shtetasit S. S., 25 vjeç, S. S., 33 vjeç, Dh. D., 33 vjeç, dhe M. B., 39 vjeç, banues në Korçë, me automjetin "Rang Rover" kanë përplasur automjetin me drejtues shtetasin M. J., 18 vjeç, të cilin dyshohet se kanë tentuar ta vrasin duke e goditur me mjete të forta në dukje armë zjarri, e cila nuk ka realizuar qitje.

Në vijim të veprimeve të kryera po në lidhje me këtë ngjarje, u arrestua në flagrancë shtetasi:

-I. S., 51 vjeç, banues në Korçë, pasi ky shtetas dyshohet se ka përkrahur 27-vjeçarin A. D., me të cilin ka lidhje shoqërore. Nga kontrolli i ushtruar në banesën e shtetasit I. D., në lagjen nr. 4, Korçë, u gjetën dhe sekuestruan në cilësinë e provës materiale 1 armë zjarri automatike dhe 1 krëhër me 30 fishekë.

Gjithashtu po nga këto struktura filloi procedimi penal për shtetasit V. D., 62 vjeç dhe R. S., 44 vjeç, banues në Korçë, pasi dyshohet se këta shtetas kanë ndihmuar autorët e ngjarjes, të fshehin provat materiale, që kanë shërbyer për kryerjen e krimit.

  (A2 Televizion)

A2 CNN Livestream

Latest Videos