Drejtori i Komunikimit në Partinë Demokratike, Alfred Lela, i ftuar në emisionin “Off the Record” nga Andrea Danglli në A2 CNN, ka deklaruar se protesta e 10 shkurtit pritet të ketë pjesëmarrje më të madhe se ajo e 24 janarit dhe se nuk do të jetë një ngjarje e izoluar, por pjesë e një sezoni të tërë protestash.
Sipas Lelës, opozita synon të rrisë presionin qytetar ndaj qeverisë, ndërsa mënyra dhe kohëzgjatja e protestës do të varen nga “pulsi i protestuesve”. Ai theksoi se zemërimi qytetar është rritur ndjeshëm pas ndërhyrjes së policisë në protestën e fundit, duke e konsideruar përdorimin e gazit lotsjellës dhe ujit si të shpërpjesëtuar dhe provokues.
“Pjesëmarrja do të jetë më e madhe se herën e kaluar. Nuk është një protestë që ka stacion më 10 shkurt. Është pjesë e një stine protestash, e një pranvere qytetare”, u shpreh Lela.
Ai kritikoi ashpër sjelljen e policisë ndaj protestuesve, duke e cilësuar atë si një reflektim të një qeverie që, sipas tij, nuk toleron kundërshtimin dhe zërin kritik. Lela shtoi se ndërhyrja e forcave të rendit ndaj protestuesve përbën një tregues të qartë të mungesës së dialogut dhe respektit për të drejtën e protestës.
Ai theksoi se opozita do të vijojë mobilizimin qytetar në ditët dhe javët në vijim, duke paralajmëruar se protestat nuk do të ndalen më 10 shkurt. (A2 Televizion)
A2 CNN Livestream
MUND TE LEXONI GJITHASHTU
