Sot është thirrur një tjetër protestë kombëtare, ndërsa për të 35-ën ditë radhazi në sheshin përpara Kryeministrisë po kërkohet dorëheqja e kryeministrit Edi Rama.
Qeveria nuk ka trajtuar pesë kërkesat e paraqitura nga protestuesit, ku kushti kryesor mbetet largimi i kreut të qeverisë. Nga ana e tij, Rama është shprehur i vendosur të qëndrojë në detyrë deri në përfundim të mandatit dhe ka deklaruar se zgjedhjet parlamentare do të mbahen në vitin 2029.
Ditët e fundit, protesta ka marrë karakter më të ashpër, duke përfshirë edhe incidente dhune përpara zonës së Kuvendit. Organizatat për të drejtat e njeriut e kanë cilësuar reagimin e policisë si joproporcional, ndërsa një pjesë e protestuesve është distancuar nga aktet e dhunës.
Në të njëjtën kohë, është bërë thirrje për shmangien e dhunës ndaj gazetarëve që po raportojnë protestën prej më shumë se një muaji. Qeveria ka shprehur gatishmëri për dialog me “protestuesit e vërtetë”, duke përjashtuar, sipas saj, grupet e ndikuara ose të financuara nga vende armiqësore ndaj Shqipërisë.
Në këtë kontekst, Rusia ka mohuar çdo përfshirje në protestë, ndërsa ambasada e Shteteve të Bashkuara në Tiranë ka shpërndarë një mesazh paralajmërues për qytetarët amerikanë, duke i këshilluar të shmangin tubimet për shkak të mundësisë së ndryshimit të shpejtë të situatës.
Protesta tashmë ka hyrë në muajin e dytë, ndërsa mbetet e paqartë se si do të vijojë në ditët në vijim. Ndërkohë, mbrëmjen e djeshme u njoftua përmes rrjeteve sociale krijimi i një “Komiteti Kombëtar të Protestës”, pas një mbledhjeje disaorëshe të organizatorëve. (A2 Televizion)
A2 CNN Livestream
MUND TE LEXONI GJITHASHTU
