Deputeti i Partisë Socialiste, Erjo Mile, i ftuar në emisionin “Off the Record” nga Andrea Danglli në A2 CNN, komentoi raportin e Këshillit të Mandateve dhe vendimin e grupit parlamentar të PS lidhur me kërkesën e SPAK.
Mile tha se raporti i paraqitur në grupin parlamentar të Partisë Socialiste u argumentua nga përfaqësuesit e mazhorancës në Këshillin e Mandateve, pas shqyrtimit të gjithë procesit ligjor që ka kaluar çështja, përfshirë edhe pritjen për një vendim nga Gjykata Kushtetuese e Shqipërisë.
Sipas tij, anëtarët e mazhorancës dhe të opozitës në Këshillin e Mandateve patën qëndrime të ndryshme, çka solli edhe paraqitjen e një raporti të veçantë nga përfaqësuesit e PS. Ai theksoi se, sipas këtij raporti, kërkesa e SPAK për një masë sigurie të shtuar nuk qëndron më.
Deputeti socialist argumentoi se masa e pezullimit nga detyra ishte ndër faktorët kryesorë të debatit juridik dhe se situata ka ndryshuar pasi Belinda Balluku nuk ushtron më funksionin e ministres apo të zëvendëskryeministres. Për këtë arsye, sipas tij, edhe logjika e pezullimit nga detyra bie.
I pyetur mbi provat e paraqitura nga SPAK, Mile u shpreh se personalisht nuk i ka parë ato pasi nuk është anëtar i Këshillit të Mandateve, por shtoi se nga raporti i paraqitur rezulton se provat janë konsideruar të pamjaftueshme për të justifikuar një masë kaq të rëndë sa heqja e lirisë.
Ai theksoi gjithashtu rëndësinë e parimit të prezumimit të pafajësisë dhe nënvizoi se masa e ndalimit për të dalë jashtë vendit mbetet në fuqi, ndërsa kërkesa për një masë më të ashpër, sipas tij, nuk gjen mbështetje në rrethanat aktuale. (A2 Televizion)
A2 CNN Livestream
MUND TE LEXONI GJITHASHTU
