“S’kemi projekt për ta anuluar”, Rama reagon sërish për Zvërnecin: Po punohet nga 5 studiot më prestigjoze në botë

Kryeministri Edi Rama ka reaguar sërish në rrjetet sociale lidhur me projektin e paralajmëruar në Zvërnec, duke deklaruar se ende nuk ekziston një projekt i përfunduar për t’u anuluar, pasi ai është ende në fazën e hartimit nga pesë studio të njohura ndërkombëtare të arkitekturës.

Rama hodhi poshtë pretendimet e ngritura nga kritikët e investimit, sipas të cilave zona e Zvërnecit do t’i jepej Izraelit për t’u kthyer në një “geto palestineze”, ndërsa theksoi se projekti do të prezantohet publikisht sapo të përfundojë.

“Të anulloj projektin? Për këtë i thirrët në protestë njerëzit e mirë që ju erdhën pas edhe sot? Dakord jam, ma sillni projektin dhe e anullojmë! Po si i bëhet që ju s’keni çfarë sillni sepse nuk ka projekt? E dini pse nuk ka projekt? Sepse projekti po punohet nga pesë studio ndër më prestigjozet në botë! Klikoni Kengo Kuma (Japoni) Bjarke Ingels (Danimarkë) Jean Nouvel (Francë) Emre Arolat (Turqi) K-Studio (Greqi) dhe njihuni me autorët e projektit arkitektonik. Së shpejti, kur projekti të jetë gati, patjetër do ta prezantojmë publikisht, siç bëjmë gjithnjë me projektet e mëdha të arkitektëve ndërkombëtarë, aq më tepër për një investim historik si ky. Kështu që më vjen keq, po s’kemi projekt për të anulluar. Po me “Izraelin që ka marrë Zvërnecin për ta bërë geto palestineze”, akoma do vazhdoni? Pra do t’i keqpërdorni akoma ndjenjat e qytetarëve të mirë, pa dallim feje e ideje, që e duan megjithë zemër Shqipërinë dhe natyrën e saj?”, shkruan Rama në “X”.

Kreu i qeverisë u ndal edhe te investitori që synon të zhvillojë projektin, duke theksuar se bëhet fjalë për një investim me vlerë 4 miliardë euro dhe duke akuzuar kundërshtarët se po dëmtojnë imazhin e Shqipërisë përballë investitorëve të huaj.

“Klikoni http://powerholding.com që ta shikoni se çfarë dëmi po i bëni Shqipërisë, duke u treguar mosmikpritës ndaj një investimi 4 miliardë Euro, i cili do të realizohet prej kompanisë “Assets”, pjesë e Power Holding! Klikoni, klikoni. Po mirë, si do ta mbani gjallë me të njëjtat gënjeshtra këtë luftën tuaj të stisur me shpifje dhe me manipulime apo mendoni se ata mes jush, që më kanë besuar e votuar mua, do ju besojnë e ndjekin qorrazi deri kur ju të realizoni planin për të cilin jeni paguar, trainuar, orkestruar, madje jo nga një usta, po nga ustallarë të ndryshëm, të cilëve nuk u dhimbset natyra e Zvërnecit, po e duan Shqipërinë tokë të djegur për investimet e mëdha që dallojnë Ligën e Kampionëve me kategoritë e dyta e të treta të destinacioneve turistike?! Madje më keq, e duan në gjunj siç ishin mësuar deri dje, jo në këmbë e me kokën lart siç është, e lëre pastaj me kurorën e princeshës së turizmit mesdhetar… Do shohim, e vërteta vonon po nuk harron dhe gënjeshtrat tuaja kanë nisur që sot t’i nxjerrin këmbët e shkurtëra”, vijon ai. (A2 Televizion)