Vendimi për shtyrjen e seancave gjyqësore nga Këshilli i Lartë Gjyqësor ka bërë që mjaft juristë të shprehen kundër pezullimit. Sipas tyre, kjo është një çështje teknike, e cila duhet të kishte gjetur një zgjidhje të mëparshme.
“Të ndërpresësh procesin gjyqësor, është sikur të ndërpresësh një pushtet, njëri prej tre pushteteve. Në këtë rast e kemi krejtësisht të ndërprerë dhe kjo nuk është fare normale dhe e pranueshme.
Dispozitat kushtetuese e parashikojnë qartë që cilat janë të drejtat që mund të privohen në kushtet e gjendjes së jashtëzakonshme për shkak të fatkeqësive natyrore. E drejta për proces të rregullt gjyqësor nuk parashikohet të kufizohet në këto lloj kushtesh”, thotë juristi Isuf Shehu. “Kemi zgjatje të afateve të paraburgimit në mënyrë të njëanshme nga Këshilli i Lartë Gjyqësor, edhe pse zgjatjet apo pezullimet duhet të bëhen vetëm nga gjykatat”, thotë avokati Saimir Vishaj.
Por situata është më e rëndë në çështjet penale në një kohë që ekziston institucioni i prezumimit të pafajësisë. “Të gjithë personat që ndodhen në paraburgim, i konsiderojmë të pafajshëm për paq kohë sa nuk ka një vendim të formës së prerë”, thotë Vishaj.
“Mund të ishte parashikuar marrja e masave për zhvillimin e seancave. Duhet të kemi parasysh që në pjesën më të madhe të rasteve proceset zhvillohen në salla dhe distanca mes palëve është e konsiderueshme”, thotë Shehu.
Deri më datë 22 prill, të gjitha çështjet gjyqësore të themelit janë pezulluar deri në një njoftim të dytë nga këshilli lartë gjyqësor. (A2 Televizion)
A2 CNN Livestream
MUND TE LEXONI GJITHASHTU
