Bota e futbollit është në zi. Ka ndërruar jetë në moshën 66-vjeçare legjenda e Milanit dhe e kombëtares italiane, Franco Baresi, një nga mbrojtësit më të mëdhenj në historinë e futbollit.
Baresi, i cili festoi 66-vjetorin më 8 maj, prej kohësh po luftonte me një sëmundje të rëndë. Në vitin 2025, ai iu nënshtrua një ndërhyrjeje kirurgjikale për një nodul në mushkëri, ndërsa vitet e fundit zhvilloi një betejë të vazhdueshme me sëmundjen, të cilën e përballoi me dinjitet dhe kurajë.
Pavarësisht gjendjes së tij shëndetësore, ai u shfaq edhe në stadiumin "San Siro" dhe ishte ndër mbajtësit e fundit të flakës olimpike në ceremoninë hapëse të Lojërave Olimpike Dimërore Milano-Cortina 2026.
Me fanellën e Milanit, Baresi zhvilloi plot 719 ndeshje, duke fituar 6 tituj kampionë të Italisë dhe tre Champions League, dy Kupa Ndërkontinentale dhe katër Superkupa të Italisë. Me kombëtaren italiane regjistroi 81 paraqitje dhe u shpall kampion bote në vitin 1982, shkruan A2CNN.
Shuarja e tij ka prekur jo vetëm Milanin, por të gjithë botën e futbollit. Klubi kuqezi i ka dhënë lamtumirën kapitenit të përjetshëm, ndërsa tifozë, ish-bashkëlojtarë dhe rivalë e kujtojnë si një simbol të besnikërisë, profesionalizmit dhe fair play-t.
Në një tjetër homazh, Milani e përshkroi Baresin si "zemra dhe shpirti" i klubit dhe u bëri thirrje tifozëve të qëndrojnë të bashkuar në kujtim të tij.
Franco Baresi largohet si një ikonë e futbollit italian dhe botëror, duke lënë pas një trashëgimi të jashtëzakonshme që do të mbetet e paharruar për brezat e ardhshëm. (A2 Televizion)
A2 CNN Livestream
MUND TE LEXONI GJITHASHTU
