Luka Jović ishte heroi i AC Milan në fitoren e thellë 3-0 kundër rivalëve të Interit, duke i siguruar Rossonerëve kalimin në finalen e Kupës së Italisë për herë të parë pas më shumë se një dekade. Me këtë fitore në ndeshjen e kthimit të gjysmëfinales, Milani e mbylli me dominim të plotë përballjen, duke e mposhtur Interin për herë të tretë këtë sezon dhe duke shuar përfundimisht ëndrrën e zikaltërve për një tjetër tripletë si ajo e vitit 2010.
Inter e nisi më mirë ndeshjen, me Darmian dhe Dimarco që rrezikuan portën e Mike Maignan, por pa sukses. Lautaro Martínez humbi një rast të artë për të kaluar Interin në avantazh. Në minutën e 36-të, Jović realizoi me kokë pas një krosimi të Jiménez, duke sjellë heshtje në San Siro.
Pjesa e dytë nisi me Milanin që dyfishoi rezultatin vetëm katër minuta pas rifillimit, sërish me Jović që shfrytëzoi një përplasje në zonë pas një goditjeje këndi. Inzaghi bëri disa zëvendësime për të ndryshuar fatin e ndeshjes, por as de Vrij me një goditje të fuqishme me kokë nuk ia doli ta mposhtte Maignan.
Në fund, Milan vulosi rezultatin me një aksion të shpejtë ku Reijnders shënoi golin e tretë pas një asisti nga Rafael Leão. Në finale, Milani do të përballet me fituesin e çiftit Empoli-Bologna. Për Interin, kjo ishte një tjetër humbje shqetësuese në prag të sfidave të mëdha kundër Romës dhe Barcelonës. (A2 Televizion)
A2 CNN Livestream
MUND TE LEXONI GJITHASHTU
