Andrea Kimi Antonelli fiton Çmimin e Madh të Belgjikës në F1, duke u rikthyer kështu te fitorja pas tre garave.
Piloti italian shfrytëzoi në maksimum superioritetin e makinës së tij Mercedes në pistën ikonike të Spa-Francorchamps dhe përforcon kryesimin e tij në rënditjen e Kampionatit Botëror, i favorizuar edhe nga tërheqja e Russell në xhiron e parë (pas një kontakti me Hamilton).
Ndërsa Leclerc duhet të kënaqet me vendin e dytë pas një gare të shkëlqyer në timonin e Ferrarit të tij; i treti rreshtohet Max Verstappen.
Lewis Hamilton (i penalizuar) përfundon i 4-ti, kurse Piastri i 5-ti.
GARA
Pasi siguroi dje "pole position"-in e gjashtë për këtë sezon, Andrea Kimi Antonelli niset nga vendi i parë në Çmimin e Madh të Belgjikës dhe përfshihet menjëherë në një dyluftim të ashpër me një Max Verstappen agresiv: të dy shkëmbejnë pozicionin e parë disa herë në kthesat e para, ndërsa gara e George Russell përfundon menjëherë. Britaniku i Mercedesit përfundon jashtë piste në zhavorr pas një kontakti me Lewis Hamilton dhe detyrohet të tërhiqet që në xhiron e parë, shkruan A2. Ndërkohë, Charles Leclerc kalon në vendin e dytë falë një parakalimi të jashtëzakonshëm nga jashtë ndaj Verstappen në kthesën Les Combes.
Pas disa xhirove nën regjimin e makinës së sigurisë (safety car), gara rifillon dhe Max rikthehet përpara Ferrarit të pilotit monegask, i cili më pas pëson një kontakt me Piastri-n në kthesën 5 gjatë xhiros së tetë. Hamilton ngjitet atëherë në vendin e katërt, por merr një penalitet prej pesë sekondash (për t'u shlyer në ndalesën e parë në boks) për incidentin me Russell. Midis pilotëve britanikë, ai që po fluturon në pistë është Norris, i cili u nis nga pozicioni i trembëdhjetë dhe u bë lideri virtual i garës në xhiron e 21-të (i vetmi ndër pilotët kryesorë që nuk i kishte ndërruar ende gomat).
Leclerc shfrytëzon një makinë sigurie virtuale (për shkak të mbetjeve në pistë) për t'u pozicionuar përpara Antonellit me numër të barabartë ndalesash në boks, duke u ngjitur më pas në vendin e parë falë parakalimit ndaj Norris në xhiron e njëzet e tretë. Ndërkohë, Hamilton hetohet për një nisje të rrezikshme nga bokset (unsafe release, pas një kontakti me një mekanik), por komisarët e shtyjnë çdo vendim për pas përfundimit të garës.
Antonelli vihet atëherë në ndjekje të Leclerc dhe zhduk një vonesë prej dy sekonda e gjysmë brenda pak xhirove, ndërsa Norris ndeshet me disa probleme gjatë ndalesës së tij në boks, duke zbritur në vendin e tetë. Megjithatë, vëmendja mbetet te lufta për kreun e garës dhe Kimi e merr atë në xhiron e tridhjetë e katërt. Lideri i kampionatit nuk i lejon asnjë hapësirë Leclerc në momentin e sulmit, por më pas e ka të vështirë të shkëputet ndjeshëm me pistën e pastër përpara. Sidoqoftë, një avantazh prej rreth dy sekondash i mjafton për të kaluar i pari vijën e finishit dhe për të fituar Çmimin e Madh të Spa-së.
Me këtë fitore, Antonelli barazon gjashtë fitoret e Patreses në F1: midis italianëve, vetëm Ascari ka bërë më mirë, me 13 fitore. Ferrari i një Leclerc-u të shkëlqyer duhet të kënaqet me vendin e dytë, ndërsa makina Red Bull e Verstappen renditet e treta. Top 5-shja plotësohet nga Hamilton dhe Piastri, me Lewis që parakalon Oscar-in në xhiron 40 nga 44 të parashikuara. Kampioni Botëror në fuqi, Lando Norris, e mbyll garën i shtati.
Sa i përket renditjes së Kampionatit Botëror, Antonelli është tani i pari me 204 pikë, ndërsa në vendin e dytë ngjitet Hamilton (159 pikë), i cili parakalon Russell-in (154 pikë) në klasifikim.
(A2 Televizion)
A2 CNN Livestream
MUND TE LEXONI GJITHASHTU
