Tentativa e fundit për “targat”, kryenegociatorët e Kosovës dhe Serbisë takohen në Bruksel

Kryenegociatorët e Kosovës dhe Serbisë takohen sot në Bruksel, në tentativën e fundit për të vulosur një marrëveshje për çështjen e targave.

Sot skadon dhe afati i ujdisë së përkohshme që rregulloi qarkullimin e automjeteve në territoret respektive me mbulimin e simboleve shtetërore.

Zëvendës kryeministri i Kosovës, Besnik Bislimi, dhe drejtori i zyrës për Kosovën në Serbi, Petar Petkoviç, pritet të takohen me ndërmjetësimin e të emëruarit të posaçëm të BE për dialogun, Miroslav Lajçak.

Zyrtari i Brukselit po zhvillon takime bilaterale me palët për të diskutuar detajet dhe temat e bisedës. Mediat e Beogradit raportojnë se pjesë e bisedës së Petkoviç me Lajçak ishte Asociacioni i Komunave Serbe në Kosovë, çështja e targave, personat e pagjetur dhe energjia. (A2 Televizion)