Ministri i Mbrojtjes, Niko Peleshi, bëri me dije se një vatër e re zjarri e rrezikshme është paraqitur në Mashkullorë të Gjirokastrës.
“Kemi dërguar atje një helikopter dhe 50 trupa që ishin dislokuar në fshatrat e Gjirokastrës”, tha Peleshi.
Më tej, ai tha se prej ditësh po punohet me 3 helikopterë në të gjithë vendin, ndërkohë që, sipas ministrit, nuk rrezikohen banesat.
Sipas Ministrisë së Mbrojtjes, situata e zjarreve gjatë ditës së sotme është e tillë:
Vlorë, Gadishulli i Karaburunit - Situata e zjarrit nuk paraqet rrezik për Parkun Kombëtar të Llogarasë.
Vatra po mbahet nën kontroll.
Kukës - Në majën e Runës gjithashtu flakët po mbahen nën kontroll nga ajri dhe toka. Flakët janë në drejtim të fshatit Shemri, por pa rrezik pasi është në distancë të largët.
Mirditë - Dy vatra zjarri ndodhen përkatësisht në fshatin Thirrë dhe Munellë. Situata aktualisht është nën kontroll dhe nuk paraqet rrezik.
Vermosh - Në Malësinë e Madhe zjarri po mbahet nën kontroll dhe nuk paraqet rrezikshmëri.
Tropojë - Është bërë i mundur izolimi i flakëve në Betosh dhe Shëngjergj.
Shkodër - Një tjetër vatër në Theth është izoluar dhe po monitorohet. Nuk paraqet rrezik.
Zjarri në fshatin Cukal është drejt shuarjes përfundimtare.
Lugina e Valbonës - Zjarri në Margegaj është në zonë shkëmbore dhe nuk paraqet rrezikshmëri. (A2 Televizion)
A2 CNN Livestream
MUND TE LEXONI GJITHASHTU
