Mbretëresha Elizabeth II vdiq nga pleqëria. Këtë ka zbuluar certifikata e saj e vdekjes.
Dokumenti, i publikuar nga National Records of Scotland të enjten, thotë se monarkja e ndjerë britanike ndërroi jetë në orën 15:10 me orën e Mbretërisë së Bashkuar më 8 shtator në Kështjellën Balmoral në Ballater, Skoci.
Shkak i vdekjes së saj renditet mosha e vjetër. Dokumenti është nënshkruar nga vajza e Mbretëreshës, Princesha Anne.
Mbretëresha më jetëgjatë e Britanisë vdiq në mënyrë paqësore në moshën 96-vjeçare.
Vdekja e saj shkaktoi një periudhë zie kombëtare. Mbreti Charles III, i cili u ngjit në fron pas vdekjes së nënës së tij, u shpall zyrtarisht si monarku i ri i Mbretërisë së Bashkuar më 10 shtator.
Charles i bëri homazhe mbretërimit historik shtatë dekadash të nënës së tij, duke e vlerësuar atë për përkushtimin e saj.
"Edhe pse jemi të pikëlluar, ne e falënderojmë për këtë jetë më besnike," tha ai gjatë ceremonisë historike në Pallatin St James.
Udhëheqësit globalë pranuan ndikimin global që mbretëresha kishte gjatë mbretërimit të saj 70-vjeçar dhe bota i dha lamtumirën monarkes më 19 shtator në një funeral shtetëror.
Ajo u varros në krah të bashkëshortit të saj dhe Mbretin Xhorxh VI, i cili vdiq në vitin 1952.
Anëtarët e familjes mbretërore, personalitetet, presidentët dhe kryeministrat u mblodhën në Westminster Abbey për ceremoninë, ndërsa dhjetëra mijëra njerëz u dyndën në rrugët përreth dhe përgjatë rrugës prej 25 miljesh nga Londra qendrore në Windsor, për t’i dhënë lamtumirën mbretëreshës. (A2 Televizion)
A2 CNN Livestream
MUND TE LEXONI GJITHASHTU
