Zelensky pas sulmit me dron në Moskë: Lufta po kthehet në Rusi

Presidenti i Ukrainës, Volodymyr Zelensky, ka paralajmëruar se lufta do të kthehet në Rusi pas një sulmi me dron në kryeqytetin Moskë.

Zelensky tha se sulmet në territorin rus ishin një "proces i pashmangshëm, i natyrshëm dhe absolutisht i drejtë" i luftës midis dy vendeve.

Nga ana e saj, ministria ruse e Mbrojtjes tha se tre dronë ukrainas u rrëzuan të dielën, ndërsa dy u përplasën në zyra. Aeroporti Vnukovo, në jugperëndim të qendrës së qytetit, u mbyll për pak kohë.

Sulmi me dron në orët e para të së dielës është i fundit për të cilin Moska ka fajësuar Kievin.

Në një fjalim video të dielën nga qyteti perëndimor i Ukrainës, Ivano-Frankivsk, Zelensky tha se Ukraina po forcohej.

“Sot është dita e 522-të e të ashtuquajturit “Operacion Special Ushtarak”, për të cilin udhëheqja ruse mendoi se do të zgjaste disa javë. Gradualisht, lufta po kthehet në territorin e Rusisë në qendrat e saj simbolike dhe bazat ushtarake, dhe ky është një proces i pashmangshëm, i natyrshëm dhe absolutisht i drejtë”, tha ai.

Një zëdhënës i Forcave Ajrore të Ukrainës tha se sulmet e fundit me dronë në Moskë kishin për qëllim të preknin rusët të cilët, që kur Kremlini pushtoi Ukrainën në shkurt 2022, mendonin se lufta ishte e largët.

Ish-presidenti rus, Dmitry Medvedev, tha të dielën se Moska do të duhej të përdorte një armë bërthamore nëse kundërofensiva e vazhdueshme e Kievit ishte e suksesshme.

Medvedev, i cili është nënkryetar i Këshillit të Sigurimit të Rusisë, një organ i kryesuar nga Putin, tha në mediat sociale se nuk do të kishte "zgjidhje tjetër" nëse Ukraina merr atë që ai e përshkroi si "tokën tonë". (A2 Televizion)