Walt Disney hap dyert e atraksionit më të ri dhe më ambicioz; Parkut tematik ‘Star Wars, Galaxy Edge’, i projektuar për të kënaqur adhuruesit e shumtë të sagës fantastiko-shkencore.
“Prej 40 vjetësh, adhuruesit kanë ëndërruar të ecin në një ambient origjinal dhe përfshirës si ai i Star Wars. Më në fund e kanë mundësinë për ta bërë këtë”, u shpreh Margaret Kerrison, përfaqësuese e Walt Disney.
Mënyra se si do ta presë publiku atraksionin më të ri, do të ketë ndikim të madh në financat e kompanisë. Parqet tematike janë ato që gjenerojnë më shumë të ardhura për Disney, pasi rrjetet mediatike janë goditur nga gara dixhitale.
Analistët vlerësojne se të paktën 1 miliard dollarë janë shpenzuar për ndërtimin e dy versioneve gati identike të “Galaxy's Edge”. Në Disneyland, në Anheim të Kalifornisë, punonjësit devijuan një lumë dhe një hekurudhë për të hapur vend, ndërsa parku i dytë në “Walt Disney World” në Orlando të Floridas, pritet të debutojë më 29 gusht.
“Qëllimi ishte të tregoheshim ambiciozë, shumë ambiciozë, jo vetëm sa i përket përmasave, por edhe detajeve artistike dhe teknologjike.”, deklaroi Bob Iger, shefi ekzekutiv i Walt Disney. Në vend që të rikrijonin shesh-xhirimin e ndonjë filmi, projektuesit vendosën të ndërtonin atë që në librat e Star Wars përshkruhej si kolonia më e madhe në planetin e quajtur Batuu, por që nuk u shfaq kurrë në ekran. Dyert do të hapen në 1 qershor, kur punonjësit do të shërbejnë për klientët, pije blu, ashtu si pija e përdorur në filmin e parë të sagës (A2 Televizion)
