1872, viti ku nisi futbolli “ndërkombëtar”: Jules Rimet dhe Henri Delaunay, mund të kenë shpikur Kupën e Botës dhe Kampionatin Europian, respektivisht në vitin 1930 dhe 1960, por Anglia dhe Skocia kanë luajtur në vitin 1872 ndeshjen e parë zyrtare mes dy kombëtareve. Atë vit, që përkon edhe me finalen e parë të Kupës së Anglisë, në përpjekje për të përhapur futbollin edhe në veri të ishullit, anglezët sfiduan Skocinë në një ndeshje, që u zhvillua në një fushë kriketi në tokën e kësaj të fundit. Ndeshja përfundoi në barazim pa gola dhe për të dhënë një ide sesi ishte futbolli asokohe, ka vetëm disa skica të bëra me laps. 
Skica nga ndeshja e parë në histori mes dy skuadrash kombëtare 
Sfida e parë mes dy skuadrave përfaqësuese përfundoi 0-0 
Sfida e parë mes dy skuadrave përfaqësuese përfundoi 0-0 
1928, “Magjistarët e Wembley-t”: Ishin vite të vështira për përfaqësuesen angleze, pasi mungonin lojtarët cilësorë. Për më tepër në një ditë më shi, skocezët i shkatërruan vendasit 5-1, duke lënë një plagë të thellë në kujtesën e tyre. “Mund të kishim shënuar edhe 10 gola”, tha pas ndeshjes Alex James, autor i një dopiete. 
1937, ndeshja me më shumë tifozë: Shifrat zyrtare të kohës flasin për 149 415 persona të pranishëm në stadiumin “Hampden Park”, edhe sot e kësaj dite mbetet ndeshja me numrin më të madh të tifozëve në Europë. Anglia befasoi vendasit duke shënuar një gol në pjesën e parë, por në të dytën skocezët realizuan 3 herë duke vulosur supremacinë e tyre në atë kohë. 
1961, “golat lumë”: Anglia vinte në këtë ndeshje pas një serie super pozitive, ku kishte mundur Irlandën e Veriut 5-2, Luksemburgun 9-0, Spanjën 4-2, Uellsin 5-1, falë yjeve që pesë vite më vonë do të fitonin e Kupën e Botës, si Jimmy Greaves, Bobby Charlton dhe Bobby Robson. Anglezët shënuan 9 gola dhe pësuan 2, duke e bërë ndeshjen me më shumë gola në Wembley. 
1967, Skocia u bë “kampione e botës”: Të paktën për një ndeshje, skocezët u ndienë të tillë, pasi dominuan në çdo aspekt ndaj Anglisë, e cila një vit më parë kishte fituar Botërorin, pikërisht në Wembley. Në stadiumin mitik, tifozët skocezë ishin 3 herë më shumë se ata anglezë, ndërsa në fushë miqtë fituan 3-2 dhe në shkallë dëgjohej vetëm thirrja “ku e keni Kupën e Botës tani?”. 
1977, traversa e thyer: Pas fitores 2-1 të Skocisë, falë një goli të mrekullueshëm nga Kenny Daglish, tifozët skocezë mësynë në “Wembley” dhe pasi grisën rrjetat, thyen traversën, morën me vete në veri një pjesë të mirë të barit. Atë natë u arrestuan 289 persona. Prej atij momenti në stadium u ngritën gardhe metalike, që do të qëndronin aty për 11 vite me radhë. 
1985, ndeshja më e shëmtuar: Të dy skuadrat nuk merrnin më pjesë në “Kampionatin Kombëtar” ku luanin edhe Irlanda e Veriut dhe Uellsi, por vendosën të luanin çdo vit kundër njëra-tjetrës, një ide që nuk zgjati shumë. Skocia fitoi 1-0 në atë vit, të vetmen herë që dilte triumfuese nga kompeticioni i quajtur “Rous Cup”, që zgjati deri në vitin 1989. 
1996, agonia e McAllister: Ndeshja mes dy skuadrave në fazën e grupeve të Kampionatit Europian mbahet mend më shumë për golin spektakolar të Paul Gascoigne, që vulosi fitoren 2-0 të anglezëve. Por penalltia e humbur nga Gary McAllister, kur ndeshja ishte 1-0, do të mbetet përgjithmonë peng për skocezët. 
1999, sfida e dyfishtë: Anglisë i duhej të luante në playoff për të marrë pjesë ne Euro 2000 dhe rivali më i papërshtatshëm që mund t’i binte ishte Skocia. Paul Scholes shënoi 2 gola në ndeshjen e parë në Glasgou, por në kthim Skocia fitoi 1-0 në Wembley. Anglia u kualifikua, por nuk do të kalonte përtej fazës së grupeve në Europian. 
2017, ndeshja e fundit: Përballja më e fundit mes dy skuadrave është ajo e zhvilluar në Hampden Park për kualifikueset e Kupës së Botës. Anglia po fitonte 1-0 deri në të 87’, kur 2 gola në 3 minuta me goditje dënimi nga Leigh Griffiths, përmbysën gjithçka. Por në minutën e tretë shtesë Harry Kane barazoi rezultatin.
Anglia dhe Skocia do të ndeshen sot në Wembley për herë të 115-të në historinë e tyre, duke regjistruar kështu një tjetër betejë në luftën më të vjetër sportive mes dy skuadrave kombëtareve.
Për herë të parë, dy përfaqësueset janë ndeshur 149 vite më parë, në atë që është edhe ndeshja e parë në historinë e futbollit mes dy skuadrave të dy shteteve të ndryshme. Sot, rivaliteti është zbehur disi, për shkak të diferencave në cilësinë e dy skuadrave, por dikur, kjo ishte e vetmja ndeshje në kalendarin sportiv të Anglisë dhe Skocisë, që të dy ekipet merrnin seriozisht.
Zbuloni përmes fotove ndeshjet më të paharrueshme mes dy rivalëve më të vjetër në historinë e futbollit. (A2 Televizion)
Galeria fotografike ( )
A2 CNN Livestream
MUND TE LEXONI GJITHASHTU
