Autoritetet izraelite kanë njoftuar se kanë ndërmarrë një operacion në qelitë e burgjeve pasi zyrtarët dëgjuan të burgosur duke shprehur “gëzim” gjatë një vale sulmesh ajrore iraniane kundër Izraelit. “Së fundmi, gjatë përshkallëzimit të përleshjeve, u dëgjuan zëra festimesh nga të burgosur kriminelë që janë banorë të territoreve palestineze” në një burg në qendër të Izraelit, deklaroi të dielën Shërbimi i Burgjeve.
Njësia elitare “Metzada” u thirr për të bastisur qelitë dhe për të nxjerrë të përfshirët. Në një video të publikuar nga vetë shërbimi i burgjeve, ushtarë të armatosur shihen duke hyrë në qeli me armë të drejtuara drejt të burgosurve, të cilët qëndrojnë të shtrirë në dysheme, shkruan A2 CNN. Një prej tyre shihet i shtrirë përmbys teksa një oficer ia lidh duart me fasheta plastike, një tjetri i mbyllin sytë. Më pas, disa burra nxirren nga qelitë të përkulur, me duart e lidhura pas shpine.
Autoritetet thanë se të burgosurit janë dërguar përpara një tribunali disiplinor dhe janë “ndëshkuar më pas”, pa dhënë detaje të tjera mbi natyrën e ndëshkimeve.
Ky veprim është pjesë e politikës së “tolerancës zero” të shpallur nga ministri i Sigurisë Kombëtare, Itamar Ben Gvir, ndaj çdo mbështetjeje për armiqtë e Izraelit. Gjatë një vizite në qytetin Petah Tikva, ku katër persona u vranë nga sulmet iraniane natën e kaluar, Ben Gvir përsëriti se autoritetet do të godasin çdo shfaqje gëzimi për sulmet ndaj Izraelit. “Ka tolerancë zero për këtë çështje. Policia ka arrestuar mjaft persona, dhe unë i mbështes — kjo është pikërisht politika ime,” tha ai të hënën.
Ministri i ekstremit të djathtë përmendi gjithashtu "pamjet" e gardianëve të burgjeve duke hyrë me armë në qeli për të "rivendosur rendin". “Kjo është politika që dua”, tha ai. “Tolerancë zero për shfaqjet e gëzimit. Tolerancë zero për ata që mbështesin Iranin. Mbështetja për Iranin është mbështetje për terrorizmin, dhe kushdo që mbështet terrorin duhet të arrestohet”. (A2 Televizion)
A2 CNN Livestream
MUND TE LEXONI GJITHASHTU
