Gërmimi u krye në përgatitje për Vitin e Shenjtë Katolik, ose Jubileun, në 2025 - U zbulua një strukturë komplekse arkitekturore me mure, që besohet të jetë zhvilluar midis shekujve 9 dhe 13 pas Krishtit.
Mbetjet e një pallati mesjetar ku papët jetonin përpara se ta bënin Vatikanin shtëpinë e tyre janë gjetur gjatë gërmimeve në Romë përpara rinovimeve të planifikuara për Vitin e Shenjtë Katolik 2025, ose Jubileun.
Zbulimin e njoftoi këtë të mërkurë ministria italiane e Kulturës, duke sqaruar se arkeologët në sheshin jashtë Arkbazilikës së Shën Gjon Lateranit, në qendër të kryeqytetit, nxorën në dritë një strukturë komplekse arkitekturore, duke përfshirë mure që besohet se kanë mbrojtur Patriarkanën, një bazilikë monumentale e krijuar nga Perandori Konstandin në shekullin e 4-të.
"Ky është një zbulim jashtëzakonisht i rëndësishëm për qytetin e Romës dhe historinë e saj mesjetare, pasi gërmime të gjera arkeologjike nuk janë kryer kurrë në shesh në kohët moderne", tha ministria.
Struktura origjinale e ndërtesës, e cila pason shpalljen e Konstandinit për tolerimin e Krishterimit në Perandorinë Romake në 313, u zgjerua gradualisht, me zhvillimin e mureve, midis shekujve 9 dhe 13 pas Krishtit, dhe strehoi Papatin deri në vitin 1305, kur ai u zhvendos përkohësisht në Avignon në Francë.
Gërmime të tjera pranë Vatikanit për zgjerimin e një tuneli rrugor përpara Jubileut kanë zbuluar javët e fundit gjurmë të një lavanderie të lashtë romake dhe një kopsht me portik që besohet se është përdorur nga perandori Caligula. (A2 Televizion)
A2 CNN Livestream
MUND TE LEXONI GJITHASHTU
