Një anije e mbytur e shekullit të 19- të e mbushur me arka shampanjë të pahapura është gjetur në thellësi të Detit Baltik. Anija u zbulua në brigjet e Suedisë nga një ekip zhytësish.
"E gjithë rrënoja është e ngarkuar me arka shampanjë dhe ujë mineral," tha Tomasz Stachura, udhëheqësi i ekipit të zhytjes Baltictech që gjeti rrënojat, në një deklaratë për shtyp dërguar CNN.
Sipas faqes së internetit të firmës, Stachura është "një nga zhytësit më aktivë në Detin Baltik", i cili "ka bërë mijëra fotografi nënujore të rrënojave të Baltikut". Megjithatë, kjo gjetje e fundit ishte ndryshe, tha ai.
"Unë jam zhytur për 40 vjet dhe shpesh ndodh që ka një ose dy shishe ... por të zbulosh një rrënojë me kaq shumë ngarkesë, është e para për mua," tha ai në njoftim.
Gjetja ishte "një rastësi", tha ai, pasi zhytësit kanë “krehur” shtratin e detit për vite në kërkim të anijeve të fundosura.
Përveç shampanjës, ishin shishet e ujit që hodhën më shumë dritë mbi historinë e anijes.
Në njoftimin për shtyp thuhet se uji ishte në shishe balte të mbyllura dhe të markës Selters, "një markë gjermane shumë e vlerësuar në shekullin e 19-të, shpesh e rezervuar për tryezat mbretërore dhe e konsideruar pothuajse medicinale". Vjen nga një burim mineral me të njëjtin emër në qytetin Selters dhe është i ambalazhuar në shishe për më shumë se 800 vjet. (A2 Televizion)
A2 CNN Livestream
MUND TE LEXONI GJITHASHTU
