Meta ka pësuar humbje të njëpasnjëshme në gjykata lidhur me mënyrën se si platformat e saj kanë synuar dhe dëmtuar përdoruesit e rinj, por një gjyq me juri që pritet të nisë të martën mund të përbëjë kërcënimin më të madh deri tani për aktivitetin e kompanisë.
Gjyqi buron nga një padi e ngritur në vitin 2023 nga 30 shtete amerikane, përfshirë Kaliforninë dhe Nju-Jorkun, të cilat pretendojnë se Meta ka shkelur në mënyrë të përsëritur ligjet federale dhe shtetërore për privatësinë e fëmijëve.
Jo vetëm që shtetet po kërkojnë më shumë se 1 trilion dollarë nga Meta, por kërkojnë gjithashtu që kompania të bëjë ndryshime në Instagram dhe Facebook, përfshirë heqjen e numrit të “pëlqimeve” dhe funksionin e “infinite scroll”.
Nëse Meta humbet përfundimisht një çështje të kësaj përmase, kjo mund të detyrojë kompaninë të bëjë ndryshime thelbësore në mënyrën se si të rinjtë i përdorin rrjetet sociale.
Shtetet që kanë paditur Metën kërkojnë gjithashtu shumë ndryshime të tjera në mënyrën se si Instagrami dhe Facebook-u funksionojnë për përdoruesit e rinj.
Ato kërkojnë që Meta:
të zbatojë një proces verifikimi nga prindërit për përdoruesit adoleshentë;
të ndryshojë “algoritmet e rekomandimit që manipulojnë dopaminën”;
të heqë shumë filtra imazhi që ndryshojnë pamjen e një personi në fotografi;
të ndalojë luajtjen automatike të videove;
të ndalojë krijimin e llogarive të shumta;
të heqë postimet që zhduken ose janë “të përkohshme”, si Instagram Stories.
Të gjitha këto funksione janë pjesë thelbësore e përvojës së sotme të përdoruesve në platformat e Meta-s. (A2 Televizion)
A2 CNN Livestream
MUND TE LEXONI GJITHASHTU
