Bie teoria e masës, OBSH: Nuk ka asnjë provë që infeksioni të jep imunitet

Nga A2 CNN
25 Prill 2020, 14:05 | Bota
Bie teoria e masës, OBSH: Nuk ka asnjë provë që infeksioni

Nuk ka prova shkencore që personat e shëruar nga Covid-19 kanë antitrupa që i mbrojnë nga një infektim i dytë. Konfirmimi vjen nga Organizata Botërore e Shëndetësisë (OBSH) me anë të një dokumenti zyrtar.

Sipas OBSH-së, në këtë pikë të pandemisë nuk ka prova të mjaftueshme mbi efikasitetin e imunitetit të antitrupave për të garantuar efikasitetin e një “pasaporte imuniteti” apo një “certifikatë çlirimi nga rreziku”. Në këtë mënyrë, bie dhe teoria e masës, në të cilën shkencëtarë të ndryshëm besonin se nëse koronavirusi prekte shumicën e popullatës në botë, atëherë do të krijohej një lloj rezistence ndaj këtij virusi të rrezikshëm.

Ndërkohë, Organizata Botërore e Shëndetësisë prezantoi një nismë ndërkombëtare bashkëpunimi për të përshpejtuar zhvillimin e teknologjive për të luftuar Covid-19. Në një event virtual, drejtori i përgjithshëm, Tedros Adhanom Ghebreyesus tha se është krenar për unitetin mes shumë partnerëve, ndërsa synimi është që të gjithë personave t’u garantohet qasja në mjetet e nevojshme për të mposhtur koronavirusin e ri: “Eksperienca e kaluar na ka mësuar se edhe nëse mjetet janë të disponueshme, nuk janë përdorur njësoj nga të gjithë. Ne nuk mund të lejojmë që kjo të ndodhë”.

Kjo iniciativë do të nxisë bashkëpunimin mes vendeve si dhe zhvillimin, prodhimin dhe shpërndarjen e barabartë të vaksinave, mjeteve të diagnostikimit dhe terapive për virusin pandemik. Që prej janarit, OBSH-ja ka punuar me mijëra studiues në të gjithë botën për të zhvilluar një vaksinë të aftë për të luftuar përhapjen e Covid-19. Në këtë bashkëpunim ka aderuar dhe një numër i lartë i aktorëve ndërkombëtarë, përfshirë Fondin Global, Bankën Botërore dhe fondacionin Bill dhe Melinda Gates.

Në eventin e OBSH-së mori pjesë Sekretari i Përgjithshëm i OKB-së, Antonio Guterres, Presidentja e Komisionit Evropian, Ursula von der Leyen, Presidenti francez, Emmanuel Macron dhe kancelarja gjermane, Angela Merkel.  (A2 Televizion)

A2 CNN Livestream

Latest Videos