Të mbledhur në sheshin “Skënderbej”, qytetarët vijuan marshimin përgjatë bulevardit “Dëshmorët e Kombit”, në ditën e pestë të protestës. Me të mbërritur te Kryeministria nisën edhe thirrjet kundër kësaj qeverie.
Organizatorët e protestës i mëshuan uljes së çmimeve. Pjesëmarrësit lajmëruan që protesta vijon edhe pasditen e së hënës, por studentët kanë premtuar një rizgjim të revoltës së tyre.
Pas fjalimeve që zgjatën për 2 orë, një grup i vogël protestuesish bllokuan për 15 minuta hyrjen e rrugës “Myslym Shyri”. Ndërhyrja e policisë mundësoi edhe normalizimin e qarkullimit rrugor në atë zonë, ndërsa nuk pati përplasje mes tyre dhe protestuesve.
Një ditë më parë, kryeministri Edi Rama premtoi një seri masash për të përballuar situatën “e luftës”, siç e cilësoi ai krizën e çmimeve që ka kapur vendin tonë, por edhe shtete të tjera të Europës dhe botës. Sipas këtij plani, pensionistët, familjet që marrin ndihmë ekonomike, fermerët dhe popullata më lehtësisht e cenueshme do të mbështetet nga qeveria për të përballuar rritjen e çmimeve.
Pikat e paketës së rezistencës sociale:
1- 3.6 miliardë lekë ose 36 milionë USD, për indeksimin e menjëhershëm të pensioneve. Kjo masë do të reflektohet që në pensionin e radhës së 673.542 pensionistëve.
2- Për 434 mijë përfitues, do të kompensojmë me lekë në dorë rritjen e çmimeve të shportës, e cila bazuar në përllogaritjen e INSTAT-it është 7% ose e kthyer në rritje mbi konsumin mesatar të llogaritur përpara goditjes, është 25 mijë lekë të vjetra.
Qeveria do të japë 30 mijë lekë të vjetra, për 3 muaj rresht, për këto kategori:
– Pensionistë që marrin më pak sesa gjysma e pagës minimale
– Pensionistë të invaliditetit
– Pensionistë që jetojnë vetëm
– Persona me aftësi të kufizuar, paraplegjikë, tetraplegjikë apo të verbër
–Të gjitha familjet që janë aktualisht në skemën e ndihmës ekonomike
3- Mbështetja për fermerët me naftë pa taksa do të shkojë në 1.4 miliardë lekë ose 14 milionë USD, me një shtesë plus prej 5 milionë USD e cila do të derdhet menjëherë.
4 – Qeveria do të mbështesë të gjithë shqiptarët që përdorin linjat urbane, qytetase dhe ndërqytetase, duke derdhur menjëherë 500 milionë lekë ose 5 milionë dollarë, për të paguar diferencën e çmimit të biletës, në mënyrë që asnjë udhëtar të mos preket nga ndryshimi i çmimit.
5 – Afrojmë dy muaj përpara futjen në fuqi të ligjit për zerimin e taksës mbi pagat deri në 400 mijë lekë të vjetra, përgjysmimin e taksës mbi pagat deri në 500 mijë lekë të vjetra, si edhe uljen e takses mbi pagat nga 1.5 deri në 2 milionë të reja.
Këto masa lehtësuese do të reflektohen në pagat e prillit dhe prej tyre do të përfitojnë 360 mijë të punësuar.
Numri i të punësuarve në Shqipëri që paguajnë zero taksë mbi pagën, arrin një shifër që s’e ka askush në rajon, 56%!
6 – Afrojmë dy muaj përpara edhe futjen në fuqi të ligjit për pagën minimale, e cila në prill do të bëhet 320 mijë lekë të vjetra.
7 – Shtojmë me 20 miliardë lekë të reja ose 200 milionë USD, financimin e mburojës së çmimit të energjisë për konsumatorët familjarë dhe biznesin e vogël. (A2 Televizion)
A2 CNN Livestream
MUND TE LEXONI GJITHASHTU
