Gazetari i A2, Julian Kasapi, deklaroi në studion e “Absolut 4” në A2 se lajm i mirë është fakti që po funksionon konfiskimi i pasurive, në lidhje me dënimin e ish-kryeprokurorit Adriatik Llalla.
“Po funksionon konfiskimi i pasurive. Rëndësi ka që të mbërrihet në këtë pikë. Por, njerëzit pyesin nëse do të bëjë burg apo jo. Të presim dhe të shikojmë vendimet e SPAK-ut. Është një hap më tej dhe është pozitiv konfiskimi i pasurisë. Mendoj se është shembull i mirë”, deklaroi Kasapi.
“Ka shumë pasuri dhe asete kriminale që, edhe pse kanë shkuar në Prokurorinë e Posaçme, janë kthyer pas. Grupe kriminale, që janë gjykuar, janë të lirë. Operacioni Forca e Ligjit është munduar t’i godasë. Paratë janë ndjekur, janë çuar në SPAK, por ato para’ vijojnë t’i gëzojnë grupet kriminale. Kjo është në kontrast me procesin e sotshëm, pasi zoti Llalla nuk përbën rrezik për shoqërinë, por vendimi është për t’u përshëndetur, pasi po shohim konfiskim pasurie. Por, do të isha më i lumtur që pasuria t’i konfiskohej grupeve kriminale. Nuk po shoh hetim pasuror edhe për persona që vijojnë të gjykohen në ish-Krimet e Rënda. Gjithçka ngelet deri te sekuestro preventive, që do të thotë sekuestrim i përkohshëm. Në momentin që pasuria vijon të mbetet në duar kriminale, vijon edhe veprimtaria kriminale, që na çon në këto pushkatimet në mes të ditës”, shtoi Kasapi. (A2 Televizion)
A2 CNN Livestream
MUND TE LEXONI GJITHASHTU
