Disa protesta të njëpasnjëshme u zhvilluan përgjatë ditës së mërkurë në Tiranë, ku të rinjtë shprehën revoltën për vrasjen e 25-vjeçarit, Klodian Rasha nga një efektiv policie. Kulmi i protestës ishte përplasja te Kryeministria.
Gurë dhe sende të tjera të forta u hodhën drejt godinës, ndërsa iu vu flaka edhe pemës dekorative. Efektivët e pakët të Policisë së Tiranës nuk e përballuan presionin e shtuar fizik të demonstruesve, ndaj u thirrën përforcime nga Forcat e Ndërhyrjes së Shpejtë, të cilët hodhën spraj dhe gaz lotsjellës ndaj protestuesve. Kjo irritoi të pranishmit dhe shoqërinë civile.
Pas shpërndarjes nga Kryeministria, turma iu drejtua sheshit “Nënë Tereza”, duke qëlluar drejt Bashkisë së Tiranës dhe më tej pati një tjetër përplasje te Drejtoria e Policisë së Tiranës. Para kulmimit pranë Kryeministrisë, protesta pati një zhvillim të theksuar edhe në nisje, te Ministria e Brendshme, ku të rinjtë hynë në brendësi të oborrit, duke u përplasur me efektivët e pakët të policisë.
Në njoftimin e saj, Policia e Shtetit bëri me dije se u plagosën 9 efektivë, 3 prej të cilëve më rëndë.
Ndërkaq, edhe mes protestuesve pati të lënduar lehtë, kryesisht nga efektet e gazit lotjsellës, pasi në asnjë moment policia nuk përdori forcën ndaj tyre. Pas analizimit të pamjeve filmike, grupi hetimor do të japë detaje rreth procedurës që do të ndiqet për këtë protestë.
Më herët, gjatë paradites, Forumi Rinor i Partisë Demokratike zhvilloi një protestë për të njëjtin qëllim, e cila ishte paqësore, pa ndonjë incident. (A2 Televizion)
A2 CNN Livestream
MUND TE LEXONI GJITHASHTU
