Tragjedi në Indi, njerëzit shtypen nga turma, mbi 40 viktima gjatë ritualit fetar

Të paktën 40 persona u vranë dhe disa të tjerë u plagosën, pasi u shkelën nga turma, gjatë një feste fetare të besimit Hindu në Indinë veriore.

Dhjetëra miliona njerëz ishin grumbulluar për të marrë pjesë në një ritual që parashikonte larjen në lumë, në kuadër të festës 6 javore, shkruan A2 CNN.

Tragjedia ka ndodhur mes orës 1 dhe 2 të mëngjesit, pranë arenës së asketëve, ku barrikada ishin vendosur për të menaxhuar turmat e mëdha gjatë zhytjes së shenjtë.

Dëshmitarët treguan se kishte pasur shtytje masive pranë zonës ku bashkohen tre lumenj të shenjtë që kishte bërë që besimtarët të binin mbi njëri-tjetrin. Një grua që ishte pjesë e turmës, rrëfeu se njerëzit shkelnin vazhdimisht mbi të dhe nënën e saj kur ato u rrëzuan.

Kryeministri Narendra Modi u përcolli ngushëllimet besimtarëve që humbën të afërmit në tragjedi, por pa specifikuar numrin e viktimave, shkruan A2 CNN. (A2 Televizion)