Në fillim të shekullit 21, Kina nuk kishte hekurudha me shpejtësi të lartë dhe trenat me shpejtësi mesatare të ulët ishin një nga mënyrat për të realizuar udhëtime në distancë të largët. Sot, është një pamje krejt tjetër dhe kombi më i populluar në botë ka rrjetin më të madh të hekurudhave me shpejtësi të lartë.
Rreth 37 900 kilometra linjë hekurudhore përshkojnë të gjithë vendin, duke lidhur të gjitha mega-qytetet kryesore të Kinës. Gjysma e këtij totali ka përfunduar vetëm në pesë vitet e fundit, dhe 3700 kilometra të tjerë pritet të hapen në muajt e ardhshëm të 2021. Rrjeti pritet të dyfishohet në gjatësi përsëri, me 70 000 kilometra, deri në vitin 2035.
Ambicia e Kinës është që ta bëjë hekurudhën me shpejtësi të lartë mënyrën e zgjedhur për udhëtimet e brendshme në distanca të gjata, por këto hekurudha të reja kanë edhe një rëndësi shumë më të madhe. Ato janë një simbol i fuqisë ekonomike të vendit, modernizimit të shpejtë dhe aftësive teknologjike në rritje. Për Partinë Komuniste në pushtet të Kinës dhe udhëheqësin e saj Xi Jinping, hekurudha me shpejtësi të lartë është gjithashtu një mjet i fuqishëm i ndikimit politik.
Kina fillimisht u mbështet në teknologjinë me shpejtësi të lartë të importuar nga Evropa dhe Japonia për të krijuar rrjetin e saj. Gjigantët globalë të inxhinierisë hekurudhore si Bombardier, Alstom dhe Mitsubishi ishin të gatshëm për të bashkëpunuar, duke pasur parasysh planet ambicioze të Kinës. Sidoqoftë, gjatë dekadës së fundit, janë kompanitë vendase ato që janë shndërruar në udhëheqëse botërore të teknologjisë dhe inxhinierisë së trenave me shpejtësi të lartë.
Kompanitë kineze janë ndër të parat në botë që prezantojnë teknologji të re siç është funksionimi i trenit autonomë (pa drejtues). Këta trena që lidhin Pekinin me provincën veriore të Hebei janë të aftë të arrijnë shpejtësi deri në 350 km/orë, duke i bërë ata trenat më të shpejtë autonomë në botë. Rruga e re, e hapur në dhjetor 2019 si pjesë e përgatitjeve për Lojërat Olimpike Dimërore dhe Paraolimpike të Pekinit 2022, ka shkurtuar kohën e udhëtimit nga tre orë në më pak se 60 minuta. (A2 Televizion)
A2 CNN Livestream
MUND TE LEXONI GJITHASHTU
