Edi Rama e nisi nga Shkupi serinë e vizitave që do ta çojnë në kryeqytetet e 5 vendeve të Ballkanit Perëndimor, në kuadër të përgatitjeve për takimin e radhës të Procesit të Berlinit, që do të organizohet në Tiranë, tetorin e ardhshëm.
Në konferencën për shtyp me homologun maqedonas Dimitar Kovaçevski, interesi i gazetarëve ishte më shumë i fokusuar te refuzimi i Kryeministrit të Kosovës, Albin Kurti për ta pritur në takim.
Pak javë pasi shefi i qeverisë së Prishtinës i lexoi Kushtetutën e Shqipërisë, Rama ia kthehu me nenet e Kanunit.
“Unë kam akoma shpresë që Albini nuk e ka harruar akoma Kanunin që kur të vjen në shtëpi dhe hasmit i hapet dera”, tha Rama.
Kur u pyet për Ballkanin e Hapur, Rama zbuti disi tonet duke shpjeguar përse po e kalonte mënjanë projektin që mbështeste me forcë deri pak kohë më parë, ndërsa në krah i doli edhe homologu i Shkupit.
“Për organizimin e takimit të Procesit të Berlinit dhe për domosdoshmërinë që të gjithë së bashku të futemi nën ombrellën e Procesit të Berlinit, dëshiroj që Ballkanin e Hapur ta lë mënjanë. Ai i ka bërë një shërbim të mirë rajonit. 1000 herë t’i kthehesha, 1000 herë do të kisha ndjekur të njëjtën rrugë”, tha Rama.
“Ballkani i Hapur” është një iniciativë që buron nga rajoni dhe në asnjë mënyrë nuk është në kundërshti me asnjë nismë tjetër”, u shpreh Kovaçevski.
Insistimi i gazetarëve për më shumë qartësi, nëse nisma konsiderohej e mbyllur, zbuloi se arkivimi mund të jetë i përkohshëm.
Rama shtoi se për sa kohë Procesi i Berlinit nuk pengohet apo ngadalësohet nga vendet e BE-së, preferon të fokusohet në ecurinë e asaj që është ombrella më e madhe e vendeve të Ballkanit Perëndimor. (A2 Televizion)
A2 CNN Livestream
MUND TE LEXONI GJITHASHTU
