Komisioni Evropian rekomandoi rihapjen graduale të kufijve për udhëtarët jashtë bllokut nga 1 korriku. Komisioni propozoi që masa e ndalimit të hyrjes në BE, të hiqet për ato vende të cilat dëshmojnë se situata e përhapjes së koronavirusit është e menaxhueshme.
“Udhëtimi ndërkombëtar është thelbësor për turizmin dhe bizneset e gjithashtu për lidhjet familjare e miqësore. Duhet të rihapni kufijtë sa më shpejt të jetë e mundur”, tha Ylva Johansson, komisionere për çështjet e brendshme.
Në propozimin e Komisionit Evropian, kufizimet është kërkuar që të hiqen për të gjitha shtetet e Ballkanit Perëndimor: Kosovë, Shqipëri, Maqedoni e Veriut, Mal i Zi, Bosnje-Hercegovinë dhe Serbi. Komisioni e ka arsyetuar këtë kërkesë me faktin që “situata epidemiologjike e tyre është e ngjashme apo edhe më e mirë sesa në BE”.
Siç thuhet, rekomandimi është edhe në përputhje me angazhimin e Komisionit Evropian që të përfshijë për së afërmi vendet e Ballkanit Perëndimor në zbatimin e udhërrëfyesit për heqjen e masave kufizuese në luftën kundër pandemisë.
Aty përfshihet edhe rekomandimi për rifillimin e punës në përfaqësitë diplomatike dhe konsullore për dhënien e vizave. Sa u përket vendeve të tjera, Komisioni ka propozuar që vendimet të kushtëzohen me situatën epidemiologjike në to. Shumica e vendeve të Bashkimit Evropian pritet të hapin kufijtë e brendshëm nga 15 qershori, por Spanja dhe Portugalia kanë thënë se do të presin edhe pak, ndërsa Danimarka planifikon të lejojë udhëtimet vetëm me Gjermaninë, Islandën dhe Norvegjinë. (A2 Televizion)
A2 CNN Livestream
MUND TE LEXONI GJITHASHTU
