Opozita e Bashkuar ka dorëzuar në Këshillin Politik shkresën që do t’i drejtojë më pas OSBE/ODIHR, ku kërkon mendimin e ekspertëve ndërkombëtarë për 5 pyetje.
Në radhë të parë, opozita dëshiron të dijë nëse dispozitat në fuqi të Kodit Zgjedhor në lidhje me koalicionet dhe formulën e ndarjes së mandateve, janë në përputhje me standardet ndërkombëtare dhe nëse këto dispozita pengojnë hapjen e listave.
Opozita e Bashkuar pyet gjithashtu nëse hapja e listave duke mos prekur pjesën e legjislacionit që lidhet me koalicionet, do të ishte në pajtueshmëri me angazhimet e OSBE-së.
Pyetja e tretë lidhet me mundësinë e ndryshimit të rregullave të lojës 6 muaj para zgjedhjeve dhe si kjo do të ndikonte në cilësinë dhe besueshmërinë e procesit.
PD dhe LSI kërkojnë mendim nga OSBE nëse një ndryshim i njëanshëm i rregullave për të favorizuar njërën palë, do të cënonte parimet e stabilitetit të ligjit, sigurinë ligjore dhe barazinë në fushën e lojës.
Në mbyllje, opozita kërkon nga OSBE/ODIHR cila do të ishte një zgjidhje e pranueshme për të dy palët, në pajtueshmëri me angazhimet e OSBE-së dhe standardet e tjera evropiane për zgjedhje demokratike.
1. A janë në përputhje me standardet ndërkombëtare dispozitat në fuqi të Kodit Zgjedhor që lidhen me mekanizmin e koalicioneve zgjedhore dhe formula përkatëse për ndarjen e mandatave?
2. A pengojnë futjen e listave të hapura mekanizmat në fuqi për koalicionet zgjedhore dhe formula përkatëse për ndarjen e mandateve? Në rast se miratohen listat e hapura ndërsa mekanizmi ekzistues i koalicioneve dhe formula për ndarjen e mandatave mbetet kjo është në fuqi, a do të ishte legjislacioni shqiptar në pajtueshmëri me angazhimet e OSBE?
3. A mund të ndryshohen rregullat themelore të garës zgjedhore nga një palë, pasi procesi zgjedhor ka nisur, dhe vetëm 6 muaj para datës së zgjedhjeve? Sa i rëndësishëm është stabiliteti i legjislacionin zgjedhor dhe njohja e ligjit nga garuesit zgjedhor para zgjedhjeve, për cilësinë dhe besueshmërinë e zgjedhjeve?
4. Nëse rregullat ndryshohen në mënyrë të njëanshme dhe shumë pranë zgjedhjeve në mënyrë që t’i japin epërsi partisë që ka propozuar ndryshimet, a minojnë këto ndryshime ose ndikojnë në parimet e stabilitetit të ligjit, sigurisë ligjore dhe rregullave të lojës, që janë kyçe për të ruajtur angazhimet e OSBE për zgjedhje demokratike?
5. Duke parë pozicionet e kundërta të palëve, cila do të ishte zgjidhja e pranueshme për të dy palët në përputhje me angazhimet e OSBE dhe standardeve të tjera europiane për zgjedhje demokratike?
Në letrën drejtuar OSBE/ODIHR, ku shpjegohet edhe qëndrimi i palëve, opozita thekson se koha e përgjigjes është shumë e rëndësishme.
“Do ta vlerësonim shumë përgjigjen e shpejtë ndaj çështjeve të mësipërme, pasi është shumë e rëndësishme për të adresuar mosmarrëveshjet mes palëve, me synim gjetjen e një zgjidhjeje të pranueshme për palët, që do të krijonte një klimë besimi të qytetarëve në një proces zgjedhor demokratik.”- thuhet në kërkesën e Opozitës së Bashkuar drejtuar OSBE/ODIHR-it.
Por, anëtari i mazhorancës në Këshillin Politik, Damian Gjiknuri refuzon të dërgojë në OSBE-ODIHR 5 pyetjet e depozituara nga opozita jashtëparlamentare në lidhje me koalicionet dhe formulën e ndarjes së mandateve.
Gjiknuri deklaroi se nuk mund të firmosë letra të njëanshme, duke i konsideruar 5 pyetjet e drejtuara nga opozita, si vazhdimësi të retorikës politike. “Nuk mund të firmos letra të njëanshme. Letra juaj është vazhdim i retorikës politike. Nuk keni sjelle asnjë draft e propozim konkret. ODIHR mund t’i drejtohemi vetëm me produkt konkret. Sipas marrëveshjes së 14 janarit, ODIHR i kërkohet opinion për çështje të administrimit zgjedhor”, shprehet mes të tjerash Gjiknuri. (A2 Televizion)
A2 CNN Livestream
MUND TE LEXONI GJITHASHTU
