Koronavirusi, Rama: Mendjet e shthurura që ju shqetësuan gjatë tërmetit, janë në veprim

Kryeministri Edi Rama, me anë të një postimi në Facebook, është munduar që të qetësojë publikun duke siguruar se, edhe pse koronavirusi nuk e ka prekur vendin tonë, janë marrë masat “në rast se do të na duhet ta përballim”.

“Koronavirusi nuk e ka prekur Shqipërinë! Por, si për gjithë botën është një kërcënim potencial, për të cilin janë marrë të gjitha masat në rast se do të na duhet ta përballim”, theksoi kreu i qeverisë.

Gjithashtu, ai theksoi se “të njëjtat mendje të shthurrura, që ju shqetësuan keq me lajmet fallco dhe me gojëligësinë e tyre gjatë ditëve e netëve të gjata pas tërmetit, janë në veprim”.

“Mos bini pre e tyre dhe jini të sigurt se shteti shqiptar po e bën prej kohësh detyrën për të qenë gati në rast shfaqjeje të koronavirusit, të cilin jemi gati ta përballim me organizim e profesionalizëm të lartë”, nënvizoi Rama. (A2 Televizion)