Kreu marrëdhënie intime në zyrë, SPAK nis hetimin ndaj Safet Gjicit

Struktura e Posaçme kundër Korrupsionit ka regjistruar hetim penal kryesisht për kryebashkiakun e Kukësit, Safet Gjici. Nisja e hetimit për Gjicin pas publikimit të një videoje intime, e dyshuar e filmuar në zyrën e tij.

Videoja në të cilën shfaqet kreu i bashkisë së Kukësit, i rikonfirmuar në detyrë më 14 maj, së bashku me një grua, është regjistruar më 6 qershor, ndërkohë që nuk dihet autorësia.

Ndërkohë, vetëm pak orë pas publikimit të pamjeve, kreu i rikonfirmuar nga zgjedhjet e 14 majit i bashkisë Kukës ka dhënë dorëheqjen. Safet Gjici akuzon kundërshtarët e tij në zgjedhje, të cilët sipas tij, vetëm duke e futur në një kurth të tillë mund të fitonin përballë tij.

Kryebashkiaku i Kukësit shprehet po ashtu se me vajzën në video ka një marrëdhënie intime prej disa kohësh tashmë. Gjici u kërkon ndjesë qytetarëve që i besuan sërish në këto zgjedhje lokale dhe shton se nuk mund ta mbajë më detyrën që ka pasi “ka tradhtuar besimin e njerëzve për faj të një mendjelehtësie të pafalshme.”

“Ndjesë të thellë publike çdokujt që sot ka parë atë material të shëmtuar video. Pas një fushate dhe përballjeje jo të lehtë me kundërshtarët e mi, pas të cilës rezultova fitues, fatkeqësisht unë rash pre e një kurthi të përgatitur me detaje nga e njëjta dorë njerëzish me të cilët u përballa në zgjedhje. Ja arritën ta bëjnë në një formë tjetër të pistë atë që se bënë dot me votën e kuksianëve. Jam shumë i keqardhur për ngjarjen dhe jam mëse i qartë se në këtë situatë nuk ka vlerë asnjë lloj sqarimi. Prej disa kohësh unë kam një marrëdhënie intime me vajzën në fjalë por sigurisht nuk kam asnjë justifikim për atë çka ka ndodhur pavarërisht se i rënë në kurth. Nuk mund të jem më unë njeriu që punon në atë zyrë shteti pasi e kam tradhëtuar besimin e atyre mijëra njerëzve që besuan e punuan me mua për ta bërë Kukësin një qytet gjithnjë e më të mirë. Ndjesë të gjithëve dhe mirënjohje gjithë jeten kujtdo më besoi dhe mbështeti. Ishte nderi i jetës time që u njollos nga një mendjelehtësi e pafalshme ndaj sot ndjej detyrimin minimal të jap dorëheqjen! Zoti ju bekoftë të gjithëve!” (A2 Televizion)

Safet Gjici në Facebook