Tërhiqet Basha, pranon humbjen në 6 mars: I gatshëm që të ndërmarr çdo hap

Kreu i PD-së, Lulzim Basha, u tërhoq nga deklarata e tij e 7 marsit, e cila krijoi një zemëratë të madhe mes demokratëve se ai nuk kishte humbur asnjëherë.

Këtë të enjte, Basha pranoi humbjen në zgjedhjet e 6 marsit, ndërsa theksoi se është i gatshëm të ndërmarrë çdo hap që PD-ja të dalë nga kjo situatë.

“Kemi filluar konsultimet për një reflektim të thellë për humbjen e 6 marsit. Padiskutim që do të marrim përgjegjësitë duke filluar nga unë i pari.

Ne jemi në një proces reflektimi. Në radhë të parë, duhet të respektojmë njerëzit që kanë mendimet e tyre. Ky proces do të vazhdojë edhe në ditët e ardhshme. Synimi është interesi më i mirë i demokratëve. Unë jam gati të bëj çdo gjë në interesin më të mirë të Partisë Demokratike.

Ju siguroj që demokratët do të marrin në dorë fatin e tyre. PD-ja do të dalë e fortë dhe e bashkuar. Detyra dhe përgjegjësia e parë është e imja. Unë jam i gatshëm të ndërmarrë çdo hap. 6 marsi ishte një mësim i madh”, tha Lulzim Basha. (A2 Televizion)