Kryetari i Lidhjes Demokratike të Kosovës, Isa Mustafa, reagoi ashpër ndaj Vjosa Osmanit, pasi kjo e fundit kundërshtoi qeverinë e re të drejtuar nga kryeministri, Avdullah Hoti.
Në një postim në profilin zyrtar në Facebook, ai shkruan se bojkotimi i saj nuk ndaloi votimin e ekzekutivit të ri.
“Iku nga përgjegjësia ta drejtojë seancën e Kuvendit, në të cilën bashkëpartiaku i saj i LDK-së do të votohej për kryeministër, kurse partia e saj, LDK, ku akoma është nënkryetare, do ta drejtonte koalicionin qeverisës. Veprim i paprecedentë dhe i papërgjegjshëm”, deklaroi Mustafa.
Megjithatë Mustafa nuk njoftoi ndonjë masë të mundshme kundër Osmanit, e cila në zgjedhjet e fundit, ishte kandidate për kryeministre e LDK-së.
Ai kritikoi Albin Kurtin, për mos pjesëmarrjen në ceremoninë e dorëzimit të detyrës duke i konsideruar deklaratat e fundit të kreut të Vetëvendosjes si të ulëta dhe të pasakta.
“Pamja e mëngjesit të sotëm e kryeministrit Hoti, në ceremoninë e nderit të njësisë së FSK-së, flet qartë se para tij nuk kishte kryeministër. Sepse çdo kryeministër me sjellje normale do t’ia dorëzonte detyrën pasardhësit të tij”, vijoi lideri i LDK-së.
Ndërkohë, Vetëvendosje vazhdon të kundërshtojë qeverinë e Hotit duke theksuar se është e paligjshme dhe kërkon zgjedhje të reja. Për këtë po organizon një peticion dhe ka grumbulluar mbi 25 mijë nënshkrime në dy ditë. (A2 Televizion)
A2 CNN Livestream
MUND TE LEXONI GJITHASHTU
